شائقین کرکٹ پشاور زلمی اور اسلام آباد یونائیٹڈ کے درمیان کوالیفائر میچ کے لیے آن لائن ای ٹکٹس خرید سکتے ہیں، پی سی بی

لاہور(اسپورٹس رپورٹر)پاکستان کرکٹ بورڈ نےکل منگل کو نیشنل بینک اسٹیڈیم کراچی میں ہونے والے پشاور زلمی اور اسلام آباد یونائیٹڈ کے درمیان کوالیفائر میچ کے ٹکٹوں کے حوالے سے اہم تفصیلات جاری کر دیں ۔اعلان کے مطابق شائقین کرکٹ 28 اپریل کے میچ کے لیے آن لائن ای ٹکٹس https://pcb.tcs.com.pk کے ذریعے خرید سکتے ہیں۔ ای ٹکٹس رکھنے والے افراد اسٹیڈیم میں داخلے کے لیے اپنے موبائل فون پر ٹکٹ اسکین کروا سکتے ہیں یا پرنٹ شدہ کاپی بھی ساتھ لا سکتے ہیں۔پاکستان کرکٹ بورڈ کے مطابق اس میچ کے لیے نیشنل بینک اسٹیڈیم کے تمام انکلوژرز کی ٹکٹ کی قیمت 500 روپے مقرر کی گئی ہے، تاکہ زیادہ سے زیادہ شائقین اس اہم مقابلے سے لطف اندوز ہو سکیں۔فزیکل ٹکٹس کراچی میں نیشنل بینک اسٹیڈیم کے بالمقابل چائنا گرائونڈ میں قائم ٹی سی ایس باکس آفس سے دستیاب ہوں گی۔ ای ٹکٹس کی فروخت آج رات سے شروع ہوگی جبکہ فزیکل ٹکٹس کل صبح سے حاصل کی جا سکیں گی۔مزید برآں لاہور میں 29 اپریل اور یکم مئی کو کھیلے جانے والے ایلیمنیٹر میچز کے ٹکٹوں سے متعلق تفصیلات بھی جلد جاری کرنے کا عندیہ دیا گیا ہے۔