دورانِ کھیل دل کا دورہ پڑنے سے نوجوان کرکٹر امان اللہ انتقال کر گئے

اٹک۔ (اسپورٹس رپورٹر):اٹک کےمقامی کرکٹر امان اللہ میچ کے دوران دل کا دورہ پڑنے سے خالقِ حقیقی سے جا ملے۔ مرحوم کو انکے آبائی قبرستان کسراں میں سپردِ خاک کر دیا گیا۔ امان اللہ گزشتہ روز مقامی گراؤنڈ میں ڈے میچ کھیل رہے تھے کہ اچانک سینے میں تکلیف کے باعث گراؤنڈ میں ہی گر پڑے۔ انہیں فوری طور پر طبی امداد کے لیے لے جایا گیا، تاہم وہ جانبر نہ ہو سکے۔مرحوم کے آبائی گاؤں کسراں کے باوثوق ذرائع کے مطابق امان اللہ عارضہ قلب میں مبتلا تھے اور ان کے دل میں پہلے ہی اسٹنٹ (Stents) ڈالے جا چکے تھے تاکہ ان کی صحت بہتر رہ سکے۔ڈاکٹروں نے انہیں ان کی طبی حالت کے پیشِ نظر سخت کھیل اور زیادہ مشقت سے منع کر رکھا تھا، لیکن کرکٹ کے شوق اور جنون کی وجہ سے وہ خود کو گراؤنڈ سے دور نہ رکھ سکے ان کی نمازِ جنازہ کسراں تحصیل پنڈی گھیب میں ادا کی گئی جس میں اہل علاقہ، کھلاڑیوں اور معززین کی کثیر تعداد نے شرکت کی۔ ہر آنکھ نم تھی اور علاقے میں فضا سوگوار رہی۔ کھیلوں سے وابستہ حلقوں نے امان اللہ کی وفات پر گہرے دکھ کا اظہار کیا ہے۔