پی ایس ایل، کراچی کنگز نے کوئٹہ گلیڈی ایٹرز کو 14 رنز سے شکست دیدی

لاہور۔(اسپورٹس رپورٹر):پاکستان سپر لیگ کے 11ویں ایڈیشن کے دوسرے میچ میں کراچی کنگز نے کوئٹہ گلیڈی ایٹرز کو 14 رنز سے شکست دے دی۔ 182 رنز کے ہدف کے تعاقب میں کوئٹہ کی ٹیم مقررہ 20 اوورز میں 7 وکٹوں کے نقصان پر 167 رنز ہی بنا سکی۔ قذافی اسٹیڈیم میں کھیلے گئے میچ میں کوئٹہ گلیڈی ایٹرز نے ٹاس جیت کر پہلے فیلڈنگ کا فیصلہ کیا۔ کراچی کنگز نے پہلے بیٹنگ کرتے ہوئے 20 اوورز میں 7 وکٹوں کے نقصان پر 181 رنز اسکور کیے۔انگلینڈ کے آل راونڈر معین علی نے شاندار بیٹنگ کا مظاہرہ کرتے ہوئے 29 گیندوں پر 4 چوکوں اور 3 چھکوں کی مدد سے 48 رنز ناٹ آؤٹ بنائے۔ کپتان ڈیوڈ وارنر نے 35 جبکہ مرزا سعد بیگ نے 30 رنز کی اننگز کھیلی۔کوئٹہ کی جانب سے احمد دانیال نے 3 اور الزاری جوزف نے 2 کھلاڑیوں کو آؤٹ کیا۔ہدف کے تعاقب میں کوئٹہ گلیڈی ایٹرز کے اوپنرز سعود شکیل اور شامل حسین نے 79 رنز کی مضبوط شراکت قائم کی۔ شامل حسین نے 24 گیندوں پر جارحانہ انداز میں 52 رنز بنائے جبکہ سعود شکیل 33 رنز کے ساتھ نمایاں رہے۔تاہم اس کے بعد دیگر بیٹرز کراچی کنگز کے باؤلرز، خاص طور پر حسن علی کا سامنا نہ کرسکے۔ کوئٹہ کی ٹیم مقررہ اوورز میں 7 وکٹوں کے نقصان پر 167 رنز تک محدود رہی۔ رائلی روسو اور بین میکڈرموٹ نے 25، 25 رنز بنائے جبکہ کراچی کے حسن علی نے 27 رنز دے کر 4 وکٹیں حاصل کیں۔