سہ ملکی ٹی ٹوئنٹی سیریز : فائنل میں پاکستان نے افغانستان کو 75 رنز سے شکست دے دی، محمد نواز نے آل راؤنڈر پرفارمنس

شارجہ (اسپورٹس ڈیسک)سہ ملکی ٹی ٹوئنٹی سیریز کے فائنل میں پاکستان نے افغانستان کو 75 رنز سے شکست دے دی، محمد نواز نے آل راؤنڈر پرفارمنس دی۔پاکستان نے افغانستان کے خلاف ٹاس جیت کر پہلے بیٹنگ کا فیصلہ کیا اور مقررہ 20 اوورز میں 8 وکٹ پر 141 رنز بنائے اور142رنز کا ہدف سیٹ کیا تھا۔افغانستان کی ٹیم 66 رنز پر ڈھیر ہو گئی، کپتان راشد خان 17 رنز کے ساتھ ٹاپ اسکورر رہے جبکہ صدیق اللّٰہ 13 رنز بنا کر پویلین لوٹے اور کوئی کھلاڑی خاطر خواہ پرفارمنس نہ دکھا سکا۔آل راؤنڈر محمد نواز نے میچ میں 25 رنز بنانے اور ساتھ ہی ہیٹ ٹرک سمیت 5 وکٹیں صرف 19 رنز کے عوض اپنے نام کر لیں، سفیان مقیم اور ابرار احمد نے 2، 2 کھلاڑی آؤٹ کیے۔محمد نواز آج کی پرفارمنس کے ساتھ سیریز میں سب سے زیادہ 10 وکٹ لینے والے کھلاڑی بھی بن گئے، اُن کے بعد راشد خان نے 9وکٹ لی ہیں۔پاکستان ٹیم میں ایک تبدیلی کی گئی تھی، سلمان مرزا کی جگہ سفیان مقیم کو شامل کیا گیا تھا۔پاکستانی اسکواڈ کپتان سلمان علی آغا، صاحبزادہ فرحان، صائم ایوب، فخر زمان، حسن نواز، محمد حارث، فہیم اشرف، شاہین آفریدی، سفیان مقیم اور ابرار احمد پر مشتمل تھا۔تماشائیوں کی بڑی تعداد میچ شروع ہونے سے کئی گھنٹے پہلے ہی شارجہ اسٹیڈیم پہنچ گئی تھی۔شارجہ میں آج موسم خاصا گرم تھا، شدت 52 سینٹی گریڈ محسوس کی جا رہی تھی۔پاکستان، افغانستان اور متحدہ عرب امارات کے درمیان ہونے والی سیریز میں یو اے ای ٹیم کو اپنے 4 میچز میں شکست کا سامنا کرنا پڑا تھا۔شارجہ میں افغانستان کے خلاف کھیلے گئے سہ ملکی سیریز کے فائنل میں محمد نواز نے 2 اوورز میں ہیٹ ٹرک مکمل کی۔محمد نواز نے افغانستان کی اننگز کے چھٹے اوور کی آخری 2 گیندوں پر وکٹ حاصل کی اور 8 ویں اوور کی پہلی گیند پر وکٹ اپنے نام کر لی۔محمد نواز نے میچ میں آل راؤنڈ پرفارمنس کا مظاہرہ بھی کیا۔انہوں نے 21 گیندوں پر 25 رنز بنائے اور ساتھ ہی 5 وکٹ لینے والے پلیئر بن گئے۔