پاکستان کوسٹ گارڈزکی کاروائی،اعلی کوالٹی کی چرس برآمد

گوادر( نمائندہ خصوصی ) پاکستان کوسٹ گارڈزکو خفیہ ذرائع سے اطلاع ملی کہ گوادر(بلوچستان) سے منشیات اسمگلنگ ہونے کا خدشہ ہے،جسکو مدِنظر رکھتے ہوئے ڈائریکٹر جنرل پاکستان کوسٹ گارڈز نے متعلقہ کمانڈر کو اپنے علاقے میں چیکنگ مزیدسخت کرنے کے احکامات جاری کیے۔ گوادر پٹرولنگ ٹیم نے لینڈ کرورز سے کشتی میں منتقل کی جانے والی 630کلو گرام اعلی کوالٹی کی چرس برآمد کر لی_ پاکستان کوسٹ گارڈز نے گاڑی، منشیات اورکشتی کو قبضے میں لے لیا،ملزمان پٹرولنگ ٹیم کو دیکھتے ہی فرار ہو گئے۔پکڑی جانے والی منشیات کی مالیت عالمی مارکیٹ میں 46.5ملین ڈالر ہے۔واضح رہے کہ پاکستان کوسٹ گارڈزمنشیات کی اسمگلنگ کی روک تھام کے لیے ہمہ وقت مصروف عمل ہے۔ پاکستان کوسٹ گارڈز ملک کو منشیات کی لعنت سے پاک کرنے میں اپنا کردار ادا کرتا رہے گا۔