عمران خان کی تقریر آئین اور ملک کے خلاف ، بیانات آئین، اداروں، افواج پاکستان اور سپریم کورٹ پر حملہ ہیں، وفاقی وزیر اطلاعات

اسلام آباد(نمائندہ خصوصی )جووفاقی وزیر اطلاعات و نشریات مریم اورنگزیب نے عمران خان کے بیان کی شدید مذمت کرتے ہوئے کہا ہے کہ عمران خان کی تقریر نفرت پر مبنی ہے جو آئین اور ملک کے خلاف ہے، اظہار رائے نہیں، ملک کو تقسیم کرنا اور خدانخواستہ ٹکڑے ٹکڑے کرنے کی بات کرنا دشمن کی زبان ہے، عمران صاحب کے بیانات آئین کے خلاف ہیں۔
جمعرات کو اپنے ایک بیان میں انہوں نے کہا کہ عمران خان کے بیانات وفاق پر حملہ ہے، وفاق پر حملے کا اعلان، اداروں کی تباہی اور ایٹمی پروگرام چھن جانے کی بات دشمن کرتا ہے۔
انہوں نے کہا کہ عمران خان کی اس حالت کی تقریر ٹی وی پر نشر نہیں ہونی چاہئے۔ وفاقی وزیر اطلاعات نے کہا کہ پاکستان کے ٹکڑے کرنے کا اعلان کرنے والی ہر زبان ٹکڑے ٹکڑے ہو جائے گی۔
عمران صاحب کے ملک کے خلاف بیانات پر قوم کا ردعمل روکنا ممکن نہیں ہوگا۔ انہوں نے کہا کہ عمران صاحب نہیں ”فارن فنڈنگ” بول رہی ہے، سچائی، خود سازشی کی اپنی زبان سے ادا ہو گئی ہے۔
مریم اورنگزیب نے کہا کہ عمران صاحب کے بیانات آئین، اداروں، افواج پاکستان اور سپریم کورٹ پر حملہ ہیں، اقتدار نہ رہے تو آئین، سپریم کورٹ، الیکشن کمیشن، وفاق پر حملہ ایک بیمار ذہنیت کی عکاسی ہے