کراچی( نمائندہ خصوصی)سول اسپتال کراچی کا ریڈیالوجی ڈیپارٹمنٹ غیرفعال ہوگیا، ایم آر آئی اور سی ٹی اسکین مشینیں کئی برس سے خراب پڑی ہیں جبکہ کارڈیک وارڈ کے وینٹی لیٹرز ٹیکنیشن نہ ہونے کی وجہ سے بند کردیئے گئے، کیتھ لیب مشینیں ڈیڑھ سال سے خراب ہیں، تھیلیم اسکین کیلئے موجود مشین گاما کیمرہ بھی غیرفعال ہیں۔ الٹرا ساﺅنڈ مشینوں کو دوسرے روم میں منتقل کرنے کیلئے بند کردیا گیا، اسپتال میں صرف ایکسرے مشینیں کام کررہی ہیں۔رتھ فاﺅ سول اسپتال کراچی صوبے کا سب سے بڑا صوبائی سرکاری اسپتال ہے، جہاں صرف کراچی ہی نہیں اندرون سندھ اور بلوچستان سے بڑی تعداد میں مریض علاج کی غرض سے آتے ہیں۔
اسپتال کا ریڈیالوجی ڈیپارٹمنٹ عملاً غیر فعال ہے، اسپتال میں ایم آر آئی اور سی ٹی اسکین مشینیں گزشتہ کئی برس سے خراب ہیں، اسپتال میں اگر کسی مریض کو سی ٹی اسکین اور ایم آر آئی کی ضرورت پیش آئے تو انہیں نجی اسپتال کا رخ کرنا پڑتا ہے، جہاں غریب مریض کو بھاری فیس ادا کرنی پڑتی ہے۔سول اسپتال کے ضرورتمند مریضوں کو این جی او کی جانب سے صدر میں قائم نجی اسپتال یا جناح اسپتال ریفر کیا جاتا ہے، جن کی ماہانہ تعداد 150 کے قریب بنتی ہے۔اسپتال میں الٹراساﺅنڈ کی 14 مشینیں موجود ہیں جو ایک این جی او نے عطیہ کی تھیں، جن میں سے 2 مشینیں ایمرجنسی، 2 میل فی میل وارڈز، 2 مشینین او پی ڈی اور ایک گائنی وارڈ میں موجود ہیں، مین روم میں لگائی گئیں 6 الٹرا ساﺅنڈ مشینیں نکال کر دوسرے روم میں منتقل کی گئیں جس کی وجہ سے وہ 6 مشینیں اس وقت آﺅٹ آف آرڈر ہیں۔
