تحریک منہاج القرآن کراچی کے زیر اہتمام انیکسی کراچی کلب میں "منہاج عید ملن تقریب” مشائخ عظام، جید اسکالرز، ملک کی نامور علمی و ادبی شخصیات اور تحریک کی مرکزی قیادت نے بھرپور شرکت ،

کراچی (اسٹاف رپورٹر)تحریک منہاج القرآن کراچی کے زیر اہتمام انیکسی کراچی کلب میں ایک پروقار "منہاج عید ملن تقریب” کا انعقاد کیا گیا، جس میں مشائخ عظام، جید اسکالرز، ملک کی نامور علمی و ادبی شخصیات اور تحریک کی مرکزی قیادت نے بھرپور شرکت کی۔ تقریب کی صدارت پاکستان عوامی تحریک کے مرکزی صدر قاضی زاہد حسین نے کی، جبکہ مہمانانِ خصوصی میں سابق آڈیٹر جنرل جلال الدین لانگاہ اور پیر سید عثمان شاہ فیروزی قاسمی شامل تھے۔تقریب سے صدارتی خطاب کرتے ہوئے پاکستان عوامی تحریک کے مرکزی صدر قاضی زاہد حسین نے کہا کہ مسلمانوں کا اتحاد آج وقت کی سب سے بڑی اور اہم ضرورت ہے۔ امتِ مسلمہ کو عصرِ حاضر کے درپیش چیلنجز اور مسائل سے نمٹنے کے لیے فروعی اختلافات کو بھلا کر متحد ہونا ہوگا اور ایک جامع لائحہ عمل اختیار کرنا ہوگا، ورنہ ترقی کا خواب ادھورا رہے گا۔تقریب کا آغاز عصمت اللہ خان کے خطبہ استقبالیہ سے ہوا۔ اس موقع پر مسعود عثمانی نے تحریک منہاج القرآن کی بین الاقوامی سطح پر شاندار کارکردگی اور خدمات کی تفصیلات پیش کیں۔ تقریب کے دوران اہم تعلیمی و ادبی اعلانات بھی کیے گئے، جن میں جامعہ کراچی کے ڈاکٹر نبیل نے نئی تعلیمی خدمات کا خاکہ پیش کیا، جبکہ پروفیسر محمود قادری نے شیخ الاسلام ڈاکٹر طاہر القادری کی شہرہ آفاق کتب کا پشتو زبان میں ترجمہ کرنے کا باقاعدہ اعلان کیا۔عید ملن تقریب سے عتیق احمد چشتی، ملک فاروق اعوان، نوید عالم، پرویز اقبال آرائیں (چیئرمین الشریف فاؤنڈیشن پاکستان)، جواد انصاری اور صوفی وقار علی نے بھی خطاب کیا اور تحریک کی دینی، ملی و فلاحی خدمات کو سراہا۔مہمانِ خصوصی پیر سید عثمان شاہ فیروزی قاسمی نےخطاب کرتے ہوئے اتحاد امت کے لیے ڈاکٹر طاہر القادری کی خدمات کو خراجِ تحسین پیش کیا۔ تقریب میں آصف اللہ رکھا، اسماعیل خلیل عارفی، نعیم میمن، ایاز ادریس، محمد قادری، حاجی بلال اور دیگر تنظیمی رہنماؤں نے خصوصی شرکت کی۔ تقریب کے اختتام پر ملک و ملت کی سلامتی، امتِ مسلمہ کے اتحاد اور امن و امان کے لیے رقت آمیز اجتماعی دعا کی گئی۔