پاکستان سمیت دنیا بھر میں انسداد تمباکو نوشی کا عالمی دن اتوار کو منایا گیا

اسلام آباد(نمائندہ خصوصی):پاکستان سمیت دنیا بھر میں انسداد تمباکو نوشی کا عالمی دن اتوار 31 مئی کو منایا گیا۔ عالمی ادارہ صحت(ڈبلیو ایچ او) نے کہا ہے کہ تمباکو نوشی ترک کرنے سے ایک سال میں دل کی بیماری کا خطرہ نصف ہو جاتا ہے، صحت کو متعدد فوائد حاصل ہو سکتے ہیں، صرف 20 منٹ میں دل کی دھڑکن معمول پر آ جاتی ہے۔ 2 سے 12 ہفتوں میں پھیپھڑوں کی کارکردگی بہتر ہو جاتی ہے۔اس دن کو منانے کا مقصد تمباکو اور تمباکو نوشی سے پیدا ہونے والے سنگین طبی خطرات کے متعلق لوگوں میں بیداری پیداکرنا ہے۔اس موقع پر عالمی ادارہ صحت نے ہیلتھ ایڈوائزری جاری کر کے تمباکو چھوڑنے سے حاصل ہونے والے فوائد کے بارے میں بتایا ۔ڈبلیو ایچ او کی جانب سے سوشل میڈیا پلیٹ فارم ایکس پر لکھاکہ آج انسداد تمباکو نوشی کا عالمی دن ہے۔ تمباکو کا استعمال کرنے والوں میں سے تقریباً 60 فیصد لوگ اسے چھوڑنا چاہتے ہیں۔شاید آپ بھی ان میں سے ایک ہوں۔ دنیا بھر میں یہ تعداد 75 کروڑ ہے۔ آپ باہمی تعاون اور مدد سے اپنے اس خواب کو سچ کر سکتے ہیں۔تمباکو چھوڑنے سے آپ کی صحت کو متعدد فوائد حاصل ہو سکتے ہیں۔ صرف 20 منٹ میں آپ کے دل کی دھڑکن معمول پر آ جاتی ہے۔ 2 سے 12 ہفتوں میں آپ کے پھیپھڑوں کی کارکردگی بہتر ہو جاتی ہے۔اس کے علاوہ ایک سال میں دل کی بیماری کا خطرہ نصف رہ جاتا ہے۔ آپ اس لت سے چھٹکارا پا سکتے ہیں۔ مدد دستیاب ہے، آج ہی چھوڑیں!۔عالمی ادارہ صحت نے دنیا بھر کی حکومتوں سے اپیل کی کہ نئی نسل کو تمباکو اور نیکوٹین کی مصنوعات کی لت سے بچائیں۔ ڈبلیو ایچ او نے وارننگ دی ہے کہ تمباکو اور نیکوٹین بنانے والی کمپنیاں جان بوجھ کر اپنی مصنوعات کو زیادہ پرکشش، استعمال میں آسان اور چھوڑنے میں مشکل بنانے کے لیے ان میں تبدیلیاں کر رہی ہیں۔عالمی دن کی مناسبت سے مختلف سرکاری، نجی، غیر سرکاری اور طبی اداروں کے زیر اہتمام مختلف تقریبات کا انعقاد کیا گیا تاکہ عام آدمی کو اس حوالہ سے آگاہی فراہم کی جا سکے۔