سینیٹر جان محمد بلیدی کی کوئٹہ میں ٹرین پر ہونے والے دہشت گرد حملے کی شدید مذمت

اسلام آباد(نمائندہ خصوصی):سینیٹر جان محمد بلیدی نے کوئٹہ میں ٹرین پر ہونے والے دہشت گرد حملے کی شدید مذمت کرتے ہوئے اس واقعے کو افسوسناک، غیر انسانی اور انتہائی قابل مذمت قرار دیا ہے۔اتوار کواپنے بیان میں انہوں نے کہا کہ اس حملے میں معصوم اور نہتے شہریوں، جن میں نوجوان، بچے اور خواتین شامل ہیں کو نشانہ بنایا گیاجو انتہائی دل دہلا دینے والا واقعہ ہے۔ انہوں نے متاثرہ خاندانوں سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ شہداء کو جوارِ رحمت میں جگہ عطا فرمائے اور لواحقین کو صبر جمیل دے۔انہوں نے زخمیوں کی جلد صحت یابی کے لیے بھی دعا کی۔جان محمد بلیدی نے کہا کہ ریاست اور حکومت کی ذمہ داری ہے کہ حملے میں زخمی ہونے والوں کو فوری اور مناسب طبی سہولیات فراہم کی جائیں اور متاثرہ خاندانوں کے نقصانات کا مکمل ازالہ کیا جائے۔انہوں نے کہا کہ نیشنل پارٹی پُرامن سیاسی اور جمہوری جدوجہد پر یقین رکھتی ہے اور ہر قسم کی دہشت گردی اور تشدد کی بھرپور مذمت کرتی ہے۔