پاکستان اور ایران کے درمیان تعلقات مذہبی، ثقافتی اور تاریخی رشتوں پر استوار ہیں ، جسٹس یحییٰ آفریدی

اسلام آباد۔(نمائندہ خصوصی):جسٹس یحییٰ آفریدی نے کہا ہے کہ پاکستان اور ایران کے درمیان تعلقات مذہبی، ثقافتی اور تاریخی رشتوں پر استوار ہیں اور دونوں ممالک کے روابط باہمی احترام اور بھائی چارے کی بنیاد پر قائم ہیں۔یہ بات انہوں نے اسلامی جمہوریہ ایران کے سفیر ڈاکٹر رضا امیری مقدم سے سپریم کورٹ آف پاکستان میں ملاقات کے دوران کہی۔ ملاقات میں دوطرفہ عدالتی تعاون، انصاف کے شعبے میں اصلاحات اور پاکستان میں قید ایرانی شہریوں سے متعلق امور پر تبادلہ خیال کیا گیا۔ اس موقع پر لاء اینڈ جسٹس کمیشن آف پاکستان کے سیکرٹری اور وزارتِ خارجہ کے alاعلیٰ حکام بھی موجود تھے۔چیف جسٹس یحییٰ آفریدی نے ایرانی عوام کیلئے نیک تمنائوں کا اظہار کرتے ہوئے ایران میں امن، استحکام اور خوشحالی کیلئے دعا کی۔ ملاقات میں دونوں ممالک کے درمیان ادارہ جاتی روابط اور عدالتی تعاون کو مزید مضبوط بنانے پر زور دیا گیا جبکہ تبادلہ پروگرامز، استعداد کار بڑھانے کے اقدامات اور عدالتی نظم و نسق و انصاف کے شعبے میں بہترین تجربات کے تبادلے پر بھی اتفاق کیا گیا۔ایرانی سفیر نے پاکستان کی عدلیہ میں جاری اصلاحاتی اقدامات کو سراہتے ہوئے قانون کی حکمرانی اور عدالتی اداروں پر عوامی اعتماد کے فروغ میں سپریم کورٹ کے کردار کی تعریف کی۔ڈاکٹر رضا امیری مقدم نے پاکستانی عدلیہ کی جانب سے پاکستان میں قید ایرانی شہریوں کے مقدمات کے جلد فیصلوں میں سہولت فراہم کرنے پر شکریہ ادا کرتے ہوئے کہا کہ متعدد مقدمات قانون کے مطابق نمٹائے گئے، جس کے نتیجے میں کئی ایرانی قیدیوں کی رہائی ممکن ہوئی۔چیف جسٹس یحییٰ آفریدی نے اس عزم کا اعادہ کیا کہ سپریم کورٹ اور ملکی عدلیہ فوری، منصفانہ اور غیر جانبدارانہ انصاف کی فراہمی کیلئے پرعزم ہیں۔ انہوں نے یقین دلایا کہ غیر ملکی شہریوں، بالخصوص ایرانی قیدیوں سے متعلق مقدمات قانون اور طے شدہ عدالتی طریقہ کار کے مطابق نمٹائے جا رہے ہیں۔