گوادر پورٹ سی پیک، علاقائی رابطہ کاری اور عالمی تجارتی سرگرمیوں کے فروغ میں کلیدی حیثیت اختیار کرتا جا رہا ہے،وفاقی وزیر جنید انوار چودھری

کوئٹہ۔ (نمائندہ خصوصی)وزیراعلیٰ بلوچستان میر سرفراز بگٹی کے وژن، وفاقی حکومت کی مؤثر بحری و تجارتی پالیسیوں اور گوادر کو خطے کے اہم معاشی و تجارتی مرکز میں تبدیل کرنے کے عزم کے تحت گوادر پورٹ پر بین الاقوامی بحری و تجارتی سرگرمیوں میں نمایاں تیزی دیکھنے میں آ رہی ہے۔ وفاقی وزیر برائے بحری امور جنید انوار چودھری کی قیادت میں گوادر پورٹ پر پاناما فلیگ بردار کارگو جہاز MV KAI XUAN لنگر انداز ہوگیا، جو 29 ہزار 832 میٹرک ٹن مشینری، صنعتی آلات اور اسٹیل پر مشتمل بھاری کارگو لے کر پہنچا ہے۔ ذرائع کے مطابق جہاز کی لمبائی 189.8 میٹر ہے، جبکہ مذکورہ کارگو چین سے سعودی عرب کے شہر دمام کے لیے روانہ کیا گیا تھا۔ جہاز گوادر آمد سے قبل فجیرہ بندرگاہ سے روانہ ہوا۔اس موقع پر وفاقی وزیر برائے بحری امور جنید انوار چودھری نے کہا کہ وفاقی حکومت گوادر پورٹ کو جدید تقاضوں سے ہم آہنگ بنانے، بین الاقوامی سرمایہ کاری کے فروغ اور عالمی شپنگ کمپنیوں کو بہترین سہولیات کی فراہمی کے لیے مؤثر اور عملی اقدامات کر رہی ہے۔ انہوں نے کہا کہ گوادر پورٹ سی پیک، علاقائی رابطہ کاری اور عالمی تجارتی سرگرمیوں کے فروغ میں کلیدی حیثیت اختیار کرتا جا رہا ہے، جس سے نہ صرف بلوچستان بلکہ ملکی معیشت کو بھی مزید استحکام حاصل ہوگا۔چیئرمین گوادر پورٹ نورالحق بلوچ نے کہا کہ گوادر پورٹ پر بڑے بین الاقوامی جہازوں کی مسلسل آمد اس بات کا واضح ثبوت ہے کہ بندرگاہ پر تجارتی سرگرمیوں کا دائرہ تیزی سے وسیع ہو رہا ہے۔ انہوں نے کہا کہ گوادر پورٹ اپنی منفرد جغرافیائی اہمیت، جدید انفراسٹرکچر اور بین الاقوامی معیار کی سہولیات کے باعث مستقبل میں خطے کی ایک مؤثر ٹرانزٹ، لاجسٹک اور تجارتی بندرگاہ کے طور پر ابھرے۔