گوادر: پسنی کے ساحل پر نایاب فن لیس پورپوائز مردہ برآمد، ماہرین کی تشویش

گوادر( نمائندہ خصوصی) پسنی کے نواحی علاقے گُرّانی کے ساحل پر ایک نایاب سمندری ممالیہ انڈو پیسیفک فن لیس پورپوائز Indo Pacific Finless Porpoise مردہ حالت میں پایا گیا ہے۔ اورماڑہ سے تعلق رکھنے والے وائلڈ لائف ایکسپرٹ اور ماحولیاتی صحافی محمود سگار نے اس نایاب نسل کی باقاعدہ تصدیق کر دی ہے۔ تفصیلات کے مطابق 15 مئی 2026 کو ساحل پر ملنے والے اس جانور کے بارے میں محمود سگار کا کہنا ہے کہ انہوں نے سائنسی مشاہدے کے بعد اس کی شناخت کی ہے۔ انہوں نے بتایا کہ یہ ایک نایاب انڈو پیسیفک فن لیس پورپوائز ہے جسے مقامی زبان میں ٹابی کہا جاتا ہے جو عالمی سطح پر تحفظ فطرت کی تنظیم ’’انٹرنیشنل یونین فار کنزرویشن آف نیچر‘‘ (IUCN) کی ریڈ لسٹ میں Vulnerable قرار دی جا چکی ہے۔ ​محمود سگار نے اس موقع پر گزشتہ واقعات کا حوالہ دیتے ہوئے بتایا کہ یہ پہلا واقعہ نہیں ہے اس سے قبل گزشتہ سال 23 نومبر 2025 کو اورماڑہ کے پدی زر ساحل پر بھی اسی نسل کا ایک پورپوائز مردہ پایا گیا تھا۔ ان کا کہنا تھا کہ مکران کی ساحلی پٹی ان نایاب جانداروں کا قدرتی مسکن ہے لیکن مسلسل اموات سمندری ماحولیات کے لیے خطرے کی گھنٹی ہیں۔ انہوں نے خدشہ ظاہر کیا کہ اس نایاب جاندار کی موت کی وجہ غیر قانونی ماہی گیری، خاص طور پر ممنوعہ گل نیٹ Gillnets ہو سکتے ہیں جن میں پھنس کر یہ دم گھٹنے کی وجہ سے ہلاک ہو جاتے ہیں۔ ​انہوں نے محکمہ وائلڈ لائف اور متعلقہ اداروں سے مطالبہ کیا ہے کہ ان نایاب جانداروں کے تحفظ کے لیے ہنگامی اقدامات کیے جائیں اور اس تازہ واقعے کی وجوہات جاننے کے لیے فوری تحقیقات کا آغاز کیا جائے۔