امن و امان کے قیام، جرائم کی روک تھام اور منشیات کے خلاف اقدامات پولیس کی بنیادی ذمہ داری ہے، آئی جی سندھ

لاڑکانہ۔( نمائندہ خصوصی):آئی جی سندھ جاویدعالم اوڈھو نے لاڑکانہ اور سکھر ڈویژن میں امن و امان کی مجموعی صورتحال کچا ایریا آپریشن نجات مہران اورپولیس اقدامات سے متعلق اجلاس کی صدارت کی۔ اجلاس میں ڈی آئی جی لاڑکانہ/ سکھر ناصر آفتاب ایس ایس پی لاڑکانہ، سکھر سمیت ایس پی اسپیشل سکھر اور ایس پی اسپیشل لاڑکانہ سمیت دیگر سینئر پولیس افسران نے شرکت کی۔آئی جی سندھ کو ڈی آئی جی لاڑکانہ/سکھر کی جانب سے شہروں میں امن و امان کی مجموعی صورتحال، جرائم کی شرح اور پولیس کی کارکردگی اور نجات مہران آپریشن پر تفصیلی بریفنگ دی گئی۔ڈی آئی جی لاڑکانہ/سکھر نے بریفنگ میں بتایا کہ نجات مہران آپریشن میں امن و امان کی صورتحال مجموعی طور پر تسلی بخش ہے اور جرائم کے تدارک کے لیے موثر اقدامات جاری ہیں، جرائم پیشہ عناصر کے خلاف ٹارگٹڈ کارروائیاں جاری ہیں۔انہوں نے کہا کہ عوام کے جان و مال کے تحفظ کو یقینی بنانے کے لیے پولیس کی موجودگی کو مزید بڑھایا گیا ہے۔بعد ازاں آئی جی سندھ جاوید عالم اوڈھو نے کہا کہ مجھے خوشی ہے میری ٹیم امن و امان کوقائم رکھنے کے لئے بہت اچھا کام کررہی ہے۔ نجات مہران آپریشن کی کامیابی افسران و جوانوں کی انتھک محنت اور بہادری کی مثال ہے۔ منشیات بالخصوص گٹکا ماوا کے خلاف نئی حکمت عملی اوربغیر رعایت کے ایکشن لیا جائے۔ انہوںنے کہا کہ امن و امان کی موجودہ صورتحال پر صرف تسلی نہیں کریں گے بلکہ پولسنگ کومزیدبہتری کی طرف لے جانے کی کوشش کریں گے۔ منشیات کے کیسز میں ٹھوس شواہد کے ساتھ کسیزکو ناقابل ضمانت بنائیں۔ امن و امان کے قیام میں کسی قسم کی غفلت برداشت نہیں کی جائے گی۔ آئی جی سندھ نے کہا کہ عوامی شکایات کے بروقت ازالے اور پولیس رسپانس کو مزید بہتر کیا جائے۔ امن و امان کے قیام، جرائم کی روک تھام اور منشیات کے خلاف اقدامات پولیس کی بنیادی ذمہ داری ہے۔