لاہور( نمائندہ خصوصی) :سینئر ایڈوائزر وزیر اعلی پنجاب برائے انفارمیشن ٹیکنالوجی سینٹر انوشہ رحمان نے ویمن چیمبر آف کامرس اینڈ انڈسٹری لاہور کا دورہ کیا،صدر ویمن چیمبر فلاحت عمران اور دیگر عہدیداران نے ان کا استقبال کیا۔ سینئر ایڈوائزر نے چیمبر میں خواتین سرمایہ کاروں سے ملاقات کی اور ان کی معاشی سرگرمیوں پر بات چیت ہوئی، ڈی جی ٹی ڈیپ رافعہ سید بھی اس موقع پر موجود تھیں۔سینئر ایڈوائزر انوشہ رحمان نے خواتین سرمایہ کاروں سے گفتگو کرتے ہوئے کہا کہ پاکستان کی خواتین باصلاحیت ہیں جنھوں نے ہر شعبے میں اپنی صلاحیتوں کا لوہا منوایا ہے۔
انہوں نے بتایا کہ انفارمیشن ٹیکنالوجی کا فروغ اور خواتین کو با اختیار بنانا وزیر اعلی پنجاب مریم نواز کی اولین ترجیحات میں شامل ہے۔خواتین ڈیجیٹل ٹیکنالوجی کے ذریعے اپنی مصنوعات کی مارکیٹنگ کریں اس مقصد کیلئے ای کامرس گیٹ وے بنانا وقت کی ضرورت ہے۔انہوں نے کہا کہ حکومت قومی اور انٹرنیشنل سطح کی صنعتی نمائشوں میں خواتین کی مصنوعات کے سٹالز لگائے میں تعاون کرے گی اور خواتین سرمایہ کاروں کو آگے بڑھنے کے لئے ہر ممکن مواقع فراہم کرے گی۔سینئر ایڈوائزر نے بتایا کہ حکومت جلد ڈیجیٹل سکلز ٹریننگ پروگرام شروع کر رہی ہے اور اس پروگرام کے تحت چار سالوں میں 60 لاکھ بچوں کو جدید تربیت مفت فراہم کی جائے گی،اس بڑے پروگرام کے ذریعے ہر سال15 لاکھ بچوں کو جدید کورسز کرائے جائیں گے،جدید تربیت کے حصول کے بعد نوجوان روزگار کے حصول کے ذریعے اپنے پاوں پر کھڑے ہوسکیں گے۔انہوں نے کہا کہ وزیر اعلی پنجاب کی ہدایت پر انفارمیشن ٹیکنالوجی کے مزید انقلابی پروگرام بھی متعارف کروائے جا رہے ہیں جن کا اعلان وزیر اعلی پنجاب خود کریں گی۔خواتین سرمایہ کاروں نے خواتین کی معاشی سرگرمیوں کے فروغ کے حوالے سے تجاویز دیں جبکہ ویمن چیمبر آف کامرس اینڈ انڈسٹری کی صدر فلاحت عمران نے چیمبر کی معاشی سرگرمیوں بارے بتایا۔
