ایران کے صدر مسعود پزشکیان کے ساتھ نہایت خوشگوار اور بامعنی گفتگو ہوئی ہے، وزیراعظم شہباز شریف

اسلام آباد( نمائندہ خصوصی):وزیراعظم محمد شہباز شریف نے کہا ہے کہ ایران کے صدر مسعود پزشکیان کے ساتھ نہایت خوشگوار اور بامعنی گفتگو ہوئی ہے،صدر پزشکیان نے آئندہ مذاکرات میں ایران کی شرکت کی توثیق کی اور پاکستان کی کوششوں کو سراہتے ہوئے پاکستانی عوام کے لئے نیک خواہشات کا اظہار کیا ہے۔بدھ کو سماجی رابطے کی ویب سائٹ ایکس پر ایک بیان میں وزیراعظم نے کہا کہ آج ان کی ایران کے صدر مسعود پزشکیان کے ساتھ نہایت خوشگوار اور بامعنی گفتگو ہوئی۔وزیر اعظم نے کہا کہ انہوں نے پاکستان کی جانب سے اسلام آباد میں اس ہفتے کے آخر میں امن مذاکرات کی میزبانی کی پیشکش قبول کرنے پر ایرانی قیادت کی دانشمندی اور بصیرت کو سراہا تاکہ خطے میں امن کی بحالی کے لئے مشترکہ کوششیں کی جا سکیں۔وزیر اعظم نے کہا کہ صدر مسعود پزشکیان نے آئندہ مذاکرات میں ایران کی شرکت کی توثیق کی اور پاکستان کی کوششوں کو سراہتے ہوئے پاکستانی عوام کے لئے نیک خواہشات کا اظہار کیا۔وزیر اعظم نے کہا کہ پاکستان خطے اور دنیا میں امن و استحکام کے فروغ کے لئے اپنے تمام دوست ممالک اور شراکت داروں کے ساتھ قریبی تعاون جاری رکھنے کے عزم کا اعادہ کرتا ہے۔