وزیر اعظم محمد شہباز شریف کی وفاقی کابینہ اجلاس میں آمد ،ارکان کا نشستوں پر کھڑے ہوکر اور تالیاں بجا کر شاندار استقبال

اسلام آباد( نمائندہ خصوصی)وزیر اعظم محمد شہباز شریف کا وفاقی کابینہ کے اجلاس میں آمد پر ارکان نے نشستوں پر کھڑے ہوکر اور تالیاں بجا کر شاندار استقبال کیا جبکہ وزیراعظم محمد شہباز شریف نے نائب وزیر اعظم و وزیرِ خارجہ محمد اسحاق ڈار اور چیف آف ڈیفنس فورسز و آرمی چیف فیلڈ مارشل سید عاصم منیر کو عارضی جنگ بندی کیلئے بے مثال کردار پر شاندار خراج تحسین پیش کیا۔بدھ کو وزیراعظم وفاقی کابینہ کے اجلاس میں شرکت کیلئے آئے تو ارکان نے پاکستان کی شاندار سفارتی کامیابی اور عارضی جنگ بندی کیلئے کوششوں کے بار آور ہونے پر وزیراعظم کا پرتپاک خیرمقدم کیا۔ ارکان نے اپنی نشستوں پر کھڑے ہو کر اور تالیاں بجا کر وزیر اعظم کا استقبال کیا اور اس تاریخی کامیابی پر انہیں مبارکباد دی ۔ وزیراعظم نے وفاقی کابینہ کے ارکان کا شکریہ ادا کیا اور وفاقی کابینہ سے اپنے خطاب میں نائب وزیراعظم و وزیر خارجہ سینیٹر اسحاق ڈار اور ان کی ٹیم کا انتھک سفارتی کوششوں پر شکریہ ادا کرتے ہوئے انہیں خراج تحسین پیش کیا ۔وزیر اعظم نے پاکستان کی اس کامیابی کا کریڈٹ اللہ تعالیٰ کی مہربانی کے بعد سیاسی و عسکری قیادت کی یکسوئی کو دیا اور کہا کہ یہ یکسوئی ہمیشہ رہے گی۔ انہوں نے کہا کہ فیلڈ مارشل سید عاصم منیر کئی راتیں جاگتے رہے اور امریکی و ایرانی قیادت سے رابطے میں رہے۔ وفاقی کابینہ کے اجلاس میں نائب وزیر اعظم سینیٹر اسحاق ڈار اور فیلڈ مارشل سید عاصم منیر کیلئے زوردار تالیاں بجائی گئیں ۔