پاکستان سمیت دنیا بھر میں صحت کا عالمی دن منایا گیا

اسلام آباد۔( نمائندہ خصوصی):پاکستان سمیت دنیا بھر میں صحت کا عالمی دن منایا گیا ۔دنیا بھر میں ہر سال 7 اپریل کو صحت کا عالمی دن اس عزم کے ساتھ منایا گیا کہ عوام کو صحت کی اہمیت سے آگاہ کیا جائے اور درپیش صحت کے عالمی چیلنجز سے نمٹنے کے لئے مشترکہ کوششیں تیز کی جائیں۔ اس دن کی مناسبت سے دنیا بھر میں سیمینارز، آگاہی واک، تقریبات اور خصوصی مہمات کا انعقاد کیا جاتا ہے۔ماہرین صحت کے مطابق صحت کا عالمی دن منانے کا بنیادی مقصد عوام میں صحت سے متعلق شعور اجاگر کرنا، بیماریوں سے بچاؤ کے طریقوں کو عام کرنا اور صحت مند طرزِ زندگی کو فروغ دینا ہے۔ اس موقع پر حکومتوں، طبی اداروں اور سماجی تنظیموں کی جانب سے مختلف پروگرامز ترتیب دیئے جاتے ہیں تاکہ لوگوں کو درپیش صحت کے مسائل سے آگاہ کیا جا سکے۔ماہرین کا کہنا ہے کہ موجودہ دور میں دنیا کوصحت کے متعدد چیلنجز کا سامنا ہے جن میں متعدی اور غیر متعدی امراض، ذہنی صحت کے مسائل، ماحولیاتی آلودگی اور نئی وبائیں شامل ہیں، ان مسائل سے نمٹنے کے لئے مربوط حکمت عملی اور عوامی تعاون ناگزیر ہے۔انہوں نے اس بات پر زور دیا کہ احتیاطی تدابیر اختیار کر تے ہوئے کئی بیماریوں سے بچا جا سکتا ہے جن میں متوازن غذا، باقاعدہ ورزش، صفائی کا خیال اور بروقت طبی معائنہ شامل ہیں۔ اس موقع پر ماہرین صحت نے عوام سے اپیل کی ہے کہ وہ اپنی اور اپنے اہلِ خانہ کی صحت کو ترجیح دیں اور صحت مند معاشرے کے قیام میں اپنا کردار ادا کریں۔