شہریوں کی انصاف تک رسائی کے لیے پاکستان اور ترکیہ ایک دوسرے کے تجربات سے استفادہ کر سکتے ہیں،وزیراعظم شہباز شریف

اسلام آباد۔( نمائندہ خصوصی):وزیر اعظم محمد شہباز شریف نے کہا ہے کہ صدیوں پر محیط پاکستان اور ترکیہ کے برادرانہ تعلقات تیزی سے جامع معاشی شراکت داری کی جانب گامزن ہیں،انصاف تک رسائی کے حصول کیلئے پاکستان اور ترکیہ ایک دوسرے کے تجربات سے استفادہ کر سکتے ہیں۔ انہوں نے ان خیالات کا اظہار ترکیہ کی آئینی عدالت کے صدر قادر اوزقایا سے گفتگو کرتے ہوئے کیا جنہوں نے منگل کو یہاں وفد کے ہمراہ ان سے ملاقات کی۔ وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے کہا کہ صدیوں پر محیط پاکستان اور ترکیہ کےبرادرانہ تعلقات تیزی سے ایک جامع معاشی شراکت داری کی جانب گامزن ہیں، شہریوں کی انصاف تک رسائی کے حصول کیلئے پاکستان اور ترکیہ ایک دوسرے کے تجربات سے استفادہ کر سکتے ہیں۔وزیراعظم نے کہا کہ ترکیہ کے وفد کے حالیہ دورے کے دوران اسی سلسلے میں دستخط ہونے والی مفاہمتی یادداشت اس منزل کی طرف پہلا قدم ہے، انصاف کی جلد فراہمی کے لیے ڈیجیٹل ٹیکنالوجی کے استعمال کے سلسلے میں دونوں ممالک کے درمیان تجربات کے تبادلہ کی وسیع استعداد موجود ہے۔ وزیراعظم نے کہا کہ پاکستان اور ترکیہ موسمیاتی تبدیلی ، انسداد دہشتگری ، امیگریشن اور دیگر شعبوں میں قوانین اور ان کے نفاذ کے سلسلے میں ایک دوسرے کے تجربات سے استفادہ کر سکتے ہیں ۔ ترکیہ کے عدالتی جج کے صدر قادراوزقایا نے پاکستان میں شاندار مہمان نوازی پر اظہار تشکر کیا۔انہوں نے کہا کہ پاکستان کے ساتھ محبت ہر ترک کی رگوں میں بسی ہے۔ انہوں نے کہا کہ ترکیہ کی آئینی عدالت 64 سال پرانی ہے اور اپنے اس وسیع تجربے کے تبادلے کیلئے پاکستان کے ساتھ ایک پائلٹ پراجیکٹ شروع کرنے کے لیے تیار ہے۔ ملاقات میں ترکیہ کے آئینی عدالت کے فاضل جج صاحبان رضوان گیولیچ اور رجائی آق یل کےعلاوہ پاکستان میں ترکیہ کے سفیرعرفان نذیر اوگلو کے علاوہ نائب وزیر اعظم و وزیر خارجہ محمد اسحاق ڈار،وفاقی وزیر قانون اعظم نذیر تارڑ،اٹارنی جنرل منصوراعوان،وزیرمملکت قانون و انصاف بیرسٹرعقیل ملک اورمعاون خصوصی طارق فاطمی بھی موجود تھے۔