برطانوی بادشاہ چارلس سوم کی صدرِ پاکستان اور عوام کو یومِ پاکستان پر مبارکباد

اسلام آباد۔( نمائندہ خصوصی):برطانوی بادشاہ چارلس سوم نے پاکستان کے قومی دن کے موقع پر صدرِ مملکت آصف علی زرداری اور پاکستانی عوام کے لیے نیک خواہشات اور مبارکباد کا پیغام بھیجا ہے۔برطانوی ہائی کمیشن اسلام آباد کے مطابق، بادشاہ چارلس سوم نے اپنے پیغام میں کہا کہ پاکستان کے قومی دن کے موقع پر، میں اور میری اہلیہ آپ کو اور اسلامی جمہوریہ پاکستان کے عوام کو دلی مبارکباد پیش کرتے ہیں۔انہوں نے دونوں ممالک کے درمیان دولتِ مشترکہ کی مشترکہ اقدار اور باہمی احترام پر مبنی دیرینہ دوستی کو سراہا۔پیغام میں برطانوی بادشاہ نے برطانیہ میں مقیم پاکستانی کمیونٹی کے کردار کی تعریف کرتے ہوئے کہا کہ متحرک برطانوی پاکستانی برادری دونوں ملکوں کے تعلقات کو روز بروز مضبوط کر رہی ہے، جبکہ خاندان، کاروبار اور ثقافت کے رشتے ہمارے عوام کو ایک دوسرے سے جوڑتے ہیں۔بادشاہ چارلس سوم نے ماحولیاتی تحفظ اور موسمیاتی تبدیلیوں کے حوالے سے پاکستان اور برطانیہ کے درمیان تعاون پر اطمینان کا اظہار کیا۔ انہوں نے خاص طور پر سیلاب سے بچاؤ کی تیاریوں، آبی انتظام اور کلین انرجی کے شعبوں میں جاری شراکت داری کو سراہا اور کہا کہ پاکستان کا شاندار قدرتی ورثہ ہمیں ماحول کے تحفظ کی مشترکہ ذمہ داری یاد دلاتا ہے۔اپنے پیغام کے آخر میں انہوں نے تمام پاکستانیوں کے لیے ایک پرامن اور خوشحال سال کی دعا کی اور اس امید کا اظہار کیا کہ رواں برس ہونے والے دولتِ مشترکہ کے سربراہی اجلاس میں دونوں ممالک مستقبل کا مشترکہ لائحہ عمل طے کرنے کے لیے دوبارہ اکٹھے ہوں گے۔