بانیان پاکستان کے وژن کے مطابق ملک کی تعمیر کے لیے کوششیں دُگنی کرنے کی ضرورت ہے،احسن اقبال

اسلام آباد۔( نمائندہ خصوصی):وفاقی وزیر برائے منصوبہ بندی و ترقی احسن اقبال نے بانیان پاکستان کے وژن کے مطابق ملک کی تعمیر کے لیے کوششیں دُگنی کرنے کی ضرورت پر زور دیا ہے۔ پیر کو یہاں پاکستان مسلم لیگ (ن) کے زیرِ اہتمام یومِ پاکستان کے سلسلہ میں منعقدہ تقریب سے خطاب کرتے ہوئے انہوں نے کہا کہ ملک کے روشن مستقبل کے لیے خود اعتمادی کے ساتھ آگے بڑھنا ہو گا۔وفاقی وزیر نے پاکستان کے قیام میں بانیانِ پاکستان کی انتھک جدوجہد اور قربانیوں کو خراجِ تحسین پیش کیا اور قائداعظم محمد علی جناح کی اُن مسلسل کوششوں کو سراہا جنہوں نے پاکستان کے خواب کو حقیقت میں بدل دیا۔ احسن اقبال نے کہا کہ پاکستان کا دفاع مضبوط ہاتھوں میں ہے۔انہوں نے گزشتہ سال بھارت کے خلاف پاکستان کی مسلح افواج کی کامیابی کا حوالہ بھی دیا۔ انہوں نے کہا کہ معرکۂ حق میں ہماری افواج نے ثابت کیا کہ وہ ہر وقت چوکس ہیں اور پیشہ ورانہ مہارت اور جدید ٹیکنالوجی سے لیس ہو کر دشمن کو شکست دینے کی صلاحیت رکھتی ہیں۔ انہوں نے مزید کہا کہ دنیا میں کوئی طاقت پاکستان کی طرف میلی آنکھ سے نہیں دیکھ سکتی۔