عید کا تہوار جنگ کے سایوں میں منایا جا رہا ہےجس کے باعث خوشیوں میں اداسی کی جھلک نمایاں ہے، عظمی ٰبخاری

لاہور( نمائندہ خصوصی):وزیر اطلاعات پنجاب عظمیٰ بخاری نے عید الفطر کے موقع پر اپنے ویڈیو پیغام میں کہا ہے کہ رواں سال عید کا تہوار جنگ کے سایوں میں منایا جا رہا ہے، جس کے باعث خوشیوں میں اداسی کی جھلک نمایاں ہے۔انہوں نے کہا کہ ہمارے دل ان بہن بھائیوں کے لیے تڑپ رہے ہیں جنہوں نے اس جنگ میں اپنے پیاروں کو کھو دیا، اسی لیے اس برس پوری قوم بوجھل دل کے ساتھ عید منا رہی ہے۔عظمی ٰبخاری نے دعا کی کہ دنیا میں جلد از جلد امن قائم ہو، معیشت دوبارہ اپنے پائوں پر کھڑی ہو ۔انہوں نے کہا کہ وزیراعلی پنجاب اور ان کی حکومت موجودہ صورتحال سے نمٹنے کے لیے مکمل طور پر تیار ہیں۔ حکومت پنجاب نے جس طرح پہلے ریلیف پراجیکٹس دئیے، اسی طرح رمضان المبارک میں بھی عوام کو بڑا ریلیف فراہم کیا گیا۔انہوں نے کہا کہ پنجاب حکومت نے گڈ گورننس کو فروغ دیتے ہوئے غریب طبقہ کو ریلیف دیا اور رمضان کو آسان بنانے کے لیے موثر اقدامات کیے، اور یہی سلسلہ مستقبل میں بھی جاری رکھا جائے گا۔عظمی ٰبخاری نے اس عزم کا اظہار کیا کہ حکومت عوام کی مشکلات کم کرنے کے لیے اپنی پالیسیاں جاری رکھے گی ۔آخر میں انہوں نے کہا کہ انشااللہ یہ مشکل وقت جلد گزر جائے گا اور ہم دوبارہ ایک معمول کی زندگی کی طرف لوٹ آئیں گے۔ انہوں نے وزیر اعلی مریم نواز اور حکومت پنجاب کی جانب سے پوری قوم کو دلی عید مبارک پیش کی اور دعا کی کہ اللہ تعالی ہم سب کے لیے خیر و برکت کا سامان پیدا فرمائے۔