ورلڈ کپ جیسے بڑے ایونٹ میں ہر اننگز یادگار ہوتی ہے ،یہ اننگز صرف میری نہیں ، پوری پاکستانی ٹیم کیلئے یادگار ہے،فہیم اشرف

لاہور(اسپورٹس ڈیسک):پاکستانی ٹیم کے آل رائونڈر فہیم اشرف نے کہا ہے کہ نیدر لینڈ ز کے خلاف میچ میں پاکستان ٹیم کی کامیابی ٹیم ورک کا نتیجہ ہے اور انشا اللہ ٹیم اپنی فتوحات کا سلسلہ جاری رکھے گی ۔ ٹی ٹوئنٹی ورلڈ کپ کے پہلے میچ میں شاندار اننگز کھیلنے کے بعد میڈیا سے گفتگو کرتے ہوئے ا نہوں نے کہاکہ وہ اس کارکردگی کے بارے میں پہلے سے کوئی اندازہ نہیں رکھتے تھے۔اس وکٹ پر رنز بنانا آسان نہیں تھا تاہم وہ دبا ئومیں نہیں آئے، جس کی وجہ سے وہ یہ اننگز کھیلنے میں کامیاب ہوئے۔ انہوں نے کہا کہ ورلڈ کپ جیسے بڑے ایونٹ میں ہر اننگز یادگار ہوتی ہے اور یہ اننگز صرف میری نہیں بلکہ پوری پاکستانی ٹیم کے لیے یادگار ہے۔فہیم اشرف نے کہا کہ کرکٹ ایک ٹیم گیم ہے اور ہر میچ میں ہر کھلاڑی پرفارم نہیں کر سکتا۔ انہوں نے کہا کہ جو کھلاڑی آج اچھا کھیل پیش نہیں کر سکے وہ آنے والے میچز میں ضرور بہتر کارکردگی دکھائیں گے۔انہوں نے مزید کہا کہ آئی سی سی ایونٹ میں یہ ان کی بہترین اننگز ہے۔ فہیم اشرف نے شائقینِ کرکٹ سے اپیل کی کہ وہ ٹیم کے لیے دعا کریں اور بھرپور سپورٹ جاری رکھیں۔ انہوں نے کہا کہ ٹیم پاکستان کے لیے خوشیاں لے کر آئے گی۔