وزیراعلیٰ بلوچستان کی سابق نگران وزیراعظم انوارالحق کاکڑ کے ہمراہ میجر عدنان اسلم کے رہائش گاہ آمد،لواحقین سے دلی تعزیت اور یکجہتی کا اظہار

کوئٹہ۔(نمائندہ خصوصی ):وزیراعلیٰ بلوچستان میر سرفراز بگٹی ہفتہ کو سابق نگران وزیر اعظم انوار الحق کاکڑ کے ہمراہ بنوں حادثے میں شہید ہونے والے میجر عدنان اسلم کے گھر گئے،انہوں نے اہل خانہ سے دلی تعزیت، ہمدردی اور یکجہتی کا اظہار کیا ۔وزیراعلیٰ بلوچستان نے کہا کہ شہید میجر عدنان اسلم نے وطن کے دفاع میں اپنی جان قربان کر کے ایک عظیم مثال قائم کی ،ان کی قربانی ہمیشہ یاد رکھی جائے گی ،شہدا کی یہ عظیم قربانیاں ملک کے امن و استحکام کی بنیاد ہیں ۔انہوں نے کہا کہ شہدا قوم کے ماتھے کا جھومر ہیں اور پوری قوم ان کی لازوال قربانیوں کی معترف اور مقروض ہے، شہید میجر عدنان اسلم نے نہ صرف اپنی بہادری بلکہ اپنی زندگی کے مقصد سے یہ ثابت کیا کہ پاکستان کے سپاہی ہر لمحہ وطن پر قربان ہونے کو تیار ہیں ۔وزیراعلیٰ نے شہید کے والد کو خراجِ تحسین پیش کرتے ہوئے کہا کہ وہ ایک بہادر سپوت کے عظیم باپ ہیں جن کے صبر اور حوصلے کو سلام پیش کرتا ہوں ۔انہوں نے کہا کہ شہید کی والدہ ایک عظیم ماں ہیں جنہوں نے وطن کے لیے میجر عدنان اسلم جیسے جانباز کو جنم دیا ،میجر عدنان کی شہادت کی خواہش ان کی والدہ کے لیے فخر اور پوری قوم کے لیے اعزاز ہے ۔وزیراعلیٰ بلوچستان میر سرفراز بگٹی نے اس موقع پر کہا کہ شہدا کی قربانیاں کبھی رائیگاں نہیں جائیں گی ،ان کا خون وطن کے دفاع، قومی یکجہتی اور امن کا ضامن ہے۔