کراچی( کرائم رپورٹر)سی آئی اے پولیس نے اسٹیل ٹاﺅن کے علاقے میں مبینہ مقابلے میں 3 ملزمان کو ہلاک کر کے ان کے قبضے سے اسلحہ اور کار برآمد کر لی ہے۔پولیس حکام کے مطابق ہلاک ہونے والے ملزمان کا تعلق اغوا کاروں کے بین الصوبائی گروہ سے ہے ، مارے جانے والے ملزمان کے دو سے تین ساتھی فرار ہونے میں کامیاب ہوگئے، ملزمان نے چند روز قبل عدنان نامی شخص کو اغوا کر کے اس کی بازیابی کے لیے 25 لاکھ روپے تاوان وصول کیا تھا۔اینٹی وائلنٹ کرائم سیل اور اینٹی وہیکل لفٹنگ سیل نے اسٹیل ٹاﺅن کے علاقے لنک روڈ یوسف جوکھیو گوٹھ میں مشترکہ آپریشن کیا، اس دوران دو طرفہ فائرنگ کے نتیجے میں 3 ملزمان مارے گئے۔
اس حوالے سے ایس ایس پی امجد حیات نے بتایاکہ سی آئی اے پولیس کو اطلاع ملی تھی کہ اسٹیل ٹاﺅن کے علاقے میں اغوا کار موجود ہیں اور کسی تاجر کو اغوا کرنے کی منصوبہ بندی کر رہے ہیں جس پر اے وی سی سی اور اے وی ایل سی کی مشترکہ ٹیم نے چھاپہ مارا جس پر ملزمان نے پولیس پارٹی پر فائرنگ کر دی۔جوابی فائرنگ کے نتیجے میں 3 اغوا کار مارے گئے جبکہ 2 سے 3 اغوا کار رات کی تاریکی کا فائدہ اٹھاتے ہوئے فرار ہونے میں کامیاب ہوگئے، مارے جانے والے ملزمان کی لاشیں چھیپا ایمبولینسوں کے ذریعے جناح اسپتال منتقل کر دی گئیں ہیں۔مارے جانے والے ملزمان کی شناخت 27 سالہ شہباز ، 30 سالہ نذیر اور 28 سالہ منصور کے نام سے ہوئی ہے۔
