کراچی(نمائندہ خصوصی )شہر قائد میں تیز ہوا کے ساتھ بوندا باندی کے بعد جناح انٹرنیشنل ایئرپورٹ کی بجلی معطل ہوگئی، ایئرپورٹ پر جنریٹر سے بھی بجلی بحالی کی کوششیں جاری رہیں۔مسافروں کو چیک ان میں مشکلات کا سامنا رہا،معطل:امیگریشن اور پسنجر ہنڈلنگ میں رکاوٹ۔فلائٹ شیڈول متاثر ہوا۔کراچی ایئرپورٹ 
پر طوفانی ہواؤں کے باعث نجی ایئر لائن کے طیارے کو لینڈنگ میں مشکل کا بھی سامنا ہوا۔واضح رہے کہ رات گئے کراچی کے مختلف علاقوں میں بوندا باندی کے بعد شہر کا موسم خوشگوار ہوگیا ہے۔اطلاعات کے مطابق لیاقت آباد، گلشن اقبال، گلستان جوہر، گرومندر، ناظم آباد، لسبیلہ سمیت کئی علاقوں میں پھوار پڑی۔
محکمہ موسمیات کا کہنا ہے کہ مغربی ہواؤں کا سسٹم سندھ پر اثر انداز ہورہا ہے، کراچی میں آئندہ دو روز کے دوران مطلع ابر آلود اور ہلکی بارش کا امکان ہے۔دوسری جانب شہر کے کئی علاقوں میں بجلی کی سپلائی 
معطل ہوگئی ہے، کلفٹن سمیت کراچی شرقی کے علاقوں میں تیز آندھی کے ساتھ مٹی کا طوفان بھی آیا ہے، جس کی وجہ سے حدِ نظر کم ہوگئی۔محکمہ موسمیات کے آفس کی بھی بجلی منقطع ہوگئی اور ان کا جنریٹر بھی کام نہیں کررہا، کے الیکٹرک حکام کے مطابق شہرمیں کوئی بڑا بریک ڈاؤن نہیں معمولی ٹرپنگ ہے۔درہں اثناء سول ایوی ایشن اتھارٹی کے ترجمان کےمطابق سی اے اے گرڈ سٹیشن سے 15 اکتوبر کو رات 11بجکر 19 منٹ پر بجلی فیل ہوئی اور 11 بجکر 56 منٹ پر بحال ہوئی۔اس دوران عمارت کے ڈومیسٹک سائیڈ میں بجلی سپلائی معمول پر رہی جبکہ جنریٹر کے AMF ماڈیول میں خرابی کی باعث عمارت کی بین الاقوامی سائیڈ کو بجلی کی فراہمی متاثر ہوئی تھی ۔اے ایم ایف AMF ماڈیول میں خرابی کم فریکوئنسی کی وجہ سے پیدا ہوئی جس کو دور کیا گیا۔ائیر سائیڈ جنریٹر کے ذریعے ائیر سائیڈ پر معمول کے مطابق 30 سیکنڈز کے اندر بجلی بحال ہوئی جبکہ بریک ڈاؤن کے دوران کوئی بھی فلائیٹ کسی خطرہ سے دوچار نہیں ہوئی ۔فلائی جناح فلائیٹ 675 کو تیز کراس ونڈز کے باعث گو آراونڈ کرایا کیا جس نے 11 بجکر 45 منٹ پر بحفاظت لینڈنگ ہوئی
