لاہور(نمائندہ خصوصی) پاکستان تحریک انصاف نے مزید 6 ممبرز کی بنیادی رکنیت معطل کردی ۔ سیکرٹری جنرل عمر ایوب کی جانب سے باضابطہ نوٹیفکیشن جاری کر دیا گیا۔ جس کے مطابق پی ٹی آئی نے حاجی شوکت علی، مجاہد میتلہ ،نادیہ عزیز ،سلیم بریار، سید ذلفقار علی شاہ اور عثمان تراکئی کی پارٹی سے بنیادی رکنیت معطل کردی ۔پی ٹی آئی کے نوٹس میں کہا ہے کہ میڈیا کے مختلف فورمز پر آپ کی پریس کانفرنس کی گردش اور بڑے پیمانے پر نشریات دیکھی گئی کہ آپ نے پاکستان تحریک انصاف چھوڑ دی ہے،آپ نے جان بوجھ کر پارٹی دفاتراور پارٹی کی بنیادی رکنیت سے استعفیٰ دینے کا اعلان کیا،لہٰذ آپ کو پاکستان تحریک انصاف کی بنیادی رکنیت ختم کرنے کا نوٹس دیا جاتا ہے۔علاوہ ازیںپی ٹی آئی کی جانب سے گلگت بلتستان الیکشن میں پارٹی پالیسی سے انحراف پر پی ٹی آئی نمائندوں کو شوکاز نوٹس جاری کردیا گیاشوکاز نوٹس ایم ایل اے گلگت بلتستان فتح اللہ خان اور حشمت اللہ خان کے نام جاری کیا گیا ہے جس میں کہا گیا ہے کہ پارٹی قیادت کے علم میں آیا ہے کہ آپ نے پارٹی کے فیصلے کے خلاف ووٹ دیا ہے، آپ کے حوالے سے گلگت بلتستان میں الیکشن کے دوران پارٹی کے خلاف سازش میں ملوث ہونے کی اطلاعات ہیں، آپ کو تین روز کے اندر تحریری طور پر وضاحت پیش کرنے کی ہدایت کی جاتی ہے، جواب نہ ملنے یا غیر تسلی بخش ہونے کی صورت میں پارٹی پالیسی اور قواعد کے مطابق مزید کارروائی کی جائے گی۔
