گورنر سندھ کی زیر صدارت گورنرہاﺅس کے افسران کا اجلاس

کراچی (نمائندہ خصوصی )گورنر سندھ کامران خان ٹیسوری کی زیر صدارت گورنر ہاس کے افسران کا اجلاس منعقد ہوا۔ اجلاس میں امید کی گھنٹی اور آئی ٹی کورسز کے حوالے سے تفصیلی بات چیت ہوئی۔پرنسپل سکریٹری ڈاکٹر سید سیف الرحمان نے گورنر سندھ کو تفصیلی بریفنگ دی۔ گورنرسندھ نے کہا کہ امید کی گھنٹی سے عام آدمی کی امیدیں بہت زیادہ ہیں،ان کے مسائل کے حل کے لئے افسران تندہی سے کام کریں اور مسائل کے حل کے بعد سائلین کو فیڈ بیک دیا جائے۔ انہوں نے مزید کہا کہ رات 12 بجے کے بعد سائلین ہر طرف سے مایوس ہوکر گورنر ہاﺅس کا رخ کرتے ہیں، ان کے مسائل حل کرنا افسران کے فرائض میں شامل ہونے کے ساتھ ساتھ ثواب کا باعث بھی ہے۔انہوں نے کہا کہ12ربیع الاول کی تعیناتی کے باعث اس عہدہ کو اللہ تعالی کی جانب سے مہلت سمجھتا ہوں، خود سے عہد کیا ہے کہ مسائل کے حل کے لئے ہر ممکن اقدامات کروں گا۔ گورنرسندھ نے افسران کو ہدایت دیتے ہوئے کہا کہ خصوصا امید کی گھنٹی کے اوقات میں سینئر افسران کی موجودگی یقینی بنائی جائے۔انہوںنے کہا کہ آئی ٹی ٹیسٹ کے حوالہ سے سارے انتظامات مکمل کرلئے جائیں،7500نوجوان ٹیسٹ کے لئے اتوار کو گورنر ہاﺅس آئیں گے، ان کی سیکورٹی اور گاڑیوں کی پارکنگ کے لئے جامع انتظامات یقینی بنائے جائیں،اتوار کے دن کے لئے افسران کو ان کی ذمہ داریوں کے بارے میں آگاہ کیا جائے۔