مہنگائی سے تنگ شہریوں کےلئے چینی اور آٹا مزید مہنگا

لاہور (نمائندہ خصوصی ) مہنگائی سے تنگ شہریوں کےلئے چینی اور آٹا مزید مہنگا ہوگیا، لاہور اور کراچی سمیت مختلف شہروں میں آٹے اور چینی کی قیمتیں تاریخ کی بلند ترین سطح پر پہنچ گئی۔میڈیا رپورٹ کے مطابق لاہورمیں آٹے کا 20 کلو والا تھیلا 50 روپے مہنگا ہوگیا، 20 کلو آٹے کا تھیلا دو ہزار 900 روپے میں فروخت ہونے لگا۔چیئرمین فلور ملز ایسوسی ایشن عاصم رضا کے مطابق اوپن مارکیٹ میں 40 کلوگرام گندم کی قیمت 4 ہزار725روپے ہوگئی، آٹے کی قیمت بڑھنے کا ذمہ دار محکمہ خوراک ہے کیونکہ سیکرٹری خوراک نے200من سے زائد گندم کی سٹوریج پر پابندی لگا دی۔دوسری جانب سیکرٹری خوراک زمان وٹو نے کہا کہ لاہور آٹے کی قیمت بڑھنے کا کوئی جواز نہیں ، بعض مفاد پرست جان بوجھ کر مارکیٹ خراب کر رہے۔دوسری جانب کراچی میں آٹے اور چینی کی قیمتیں تاریخ کی بلند ترین سطح پر برقرار ہے، ہول سیل مارکیٹ جوڑیا بازارمیں پھرچینی 3 روپے فی کلو مہنگی ہوگئی، ہول سیل میں چینی کی فی کلو قیمت ریکارڈ 135 روپے فی کلو ہوگئی۔تین ہفتے میں چینی کی فی کلو قیمت میں 21 روپے کا غیرمعمولی اضافہ ہوا ہے، ریٹیل میں عوام کیلئے چینی کی قیمت 150 روپے جبکہ آٹے کی فی کلو قیمت 160روپے تک جا پہنچی۔ رپورٹ کے مطابق پشاورمیں بھی آٹے کی قیمتوں کا گراف ایک بار پھر چڑھنے لگا، چوبیس سو میں فروخت ہونے والا بیس کلو آٹے کا تھیلا 28 سو میں بک رہا ہے۔