اسرائیل اور امریکہ نے نئے حملے کیے تو ’’اس بار جنگ خطے کی حدود سے بھی باہر پھیل جائے گی۔‘‘پاسداران انقلاب”

تہران ( مانیٹرنگ ڈیسک)ایران کے پاسداران انقلاب نے بدھ کے روز امریکی صدر ڈونلڈ ٹرمپ کے حالیہ انتباہات کے جواب میں تنازعے کے دائرہ کار کو وسیع کرنےکی دھمکی دی ہے۔ایرانی نیوز ایجنسی تسنیم کے مطابق اسلامی پاسداران انقلاب (آئی آر جی سی) نے خبردار کیا ہے کہ اگر اسرائیل اور امریکہ نے نئے حملے کیے تو ’’اس بار جنگ خطے کی حدود سے بھی باہر پھیل جائے گی۔‘‘بیان کے مطابق ایران ایسے مقامات کو نشانہ بنائے گا، جہاں دشمن کا وہم و گمان بھی نہیں ہو گا۔اس سے قبل منگل کو ایران کے نائب وزیر خارجہ کاظم غریب آبادی بھی کشیدگی بڑھانے کی تیاری کا اشارہ دے چکے ہیں۔ انہوں نے ایکس پر لکھا، ’’ایران متحد ہے اور کسی بھی فوجی جارحیت کا ڈٹ کر مقابلہb کرنے کے لیے پوری طرح تیار ہے۔ ہمارے لیے ہتھیار ڈالنے کا کوئی تصور نہیں۔‘‘پیر کو ٹرمپ نے انکشاف کیا تھا کہ انہوں نے منگل کے روز ایران پر فوجی حملوں کا منصوبہ بنایا تھا لیکن جنگ ختم کرنے کے لیے ’’سنجیدہ مذاکرات‘‘ بنا پر اسے روک دیا۔اس کے بعد منگل کو انہوں نے دعویٰ کیا کہ ایرانی قیادت معاہدے کے لیے ’’گڑگڑا رہی ہے‘‘ اور اگر چند دنوں میں کوئی معاہدہ نہ ہوا تو امریکہ حملے کرے گا۔