ولن کردار کی وجہ سے تقریبات میں مرد اپنی بیویوں کو مجھ سے چھپا لیتے تھے: اداکار پریم چوپڑا کا انکشاف

ممبئی ( شوبز ڈیسک)بالی ووڈ کے معروف اداکارپریم چوپڑا نے حال ہی میں انکشاف کیا ہے کہ اپنے کیریئر کے ابتدائی دور میں وہ خاندانی تقریبات میں شرکت نہیں کر پاتے تھے، اور اس کی بڑی وجہ ان کے ولن کردار تھے۔میڈیا رپورٹس کے مطابق، پریم چوپڑا نے بتایا کہ فلموں میں منفی کردار ادا کرنے کی وجہ سے لوگ انہیں حقیقی زندگی میں بھی ویسا ہی سمجھتے تھے۔ اسی وجہ سے جب وہ شادیوں یا فیملی فنکشنز میں جاتے تو لوگ ان سے گھبراتے اور دور رہتے تھے۔اداکار نے مزید کہا کہ کئی مواقع پر تو حالات اس قدر عجیب ہو جاتے تھے کہ مرد اپنی بیویوں کو ان سے چھپا لیتے تھے۔پریم چوپڑا کے مطابق، اس صورتحال کو سنبھالنے کے لیے ان کے والد کو لوگوں کو سمجھانا پڑتا تھا کہ وہ حقیقی زندگی میں ایک اچھے انسان ہیں اور فلموں میں ادا کیا جانے والا کردار صرف ان کا پیشہ ہے۔انہوں نے یہ بھی کہا کہ ماضی میں ناظرین اداکار اور کردار میں فرق نہیں کر پاتے تھے، جبکہ آج کے دور میں لوگ اس فرق کو بہتر انداز میں سمجھتے ہیں۔واضح رہے کہ پریم چوپڑا نے اپنے طویل کیریئر میں 380 سے زائد فلموں میں کام کیا اور بالی ووڈ کے مشہور ولن کے طور پر پہچانے جاتے ہیں۔