وزیراعلیٰ بلوچستان نے جھلسنے والے کم سن بچے کے علاج کے اخراجات حکومت کے ذمہ لینے کا حکم جاری کردیا

کوئٹہ( نمائندہ خصوصی):وزیر اعلیٰ بلوچستان میر سرفراز بگٹی نے گھریلو حادثے میں جھلسنے والے کم سن بچے حسنین کے علاج کے تمام اخراجات حکومت کے ذمہ لینے کے احکامات جاری کردیے ، بچہ گزشتہ روز اپنے گھر میں جھلس کر شدید زخمی ہوگیا تھا۔ وزیر اعلیٰ ہائوس سے جاری بیان کے مطابق بچے کے والد مغربی بائی پاس کوئٹہ کے محنت کش عبدالخالق علاج کرانے سے قاصر تھے، تاہم وزیر اعلیٰ بلوچستان کی ہدایت پر بچے کو فوری طور پر سی ایم ایچ کوئٹہ منتقل کر کے علاج معالجہ شروع کر دیا گیا ،حکومتی بروقت اقدام اور ماہر طبی ٹیم کی کوششوں کے نتیجے میں معصوم بچے کی جان بچائی گئی اور وہ اب روبصحت ہے۔ وزیر اعلیٰ بلوچستان نے بچے کی جلد صحت یابی کے لیے دعا اور نیک خواہشات کا اظہار کیا ۔حسنین کے والدین نے وزیر اعلیٰ میر سرفراز بگٹی کا دل کی گہرائیوں سے شکریہ ادا کیا اور ان کے لیے دعاؤں اور نیک تمناؤں کا اظہار کیا۔