پٹرولیم مصنوعات کی ذخیرہ اندوزی کرنے اور ناجائز منافع خوروں کے خلاف کریک ڈاؤن،پمپس سیل، لائسنس منسوخ ہوں گے

لاہور( نمائندہ خصوصی)پٹرولیم مصنوعات کی ذخیرہ اندوزی کرنے والوں اورناجائز منافع خوروں کے خلاف گرینڈ آپریشن کا آغازکردیا گیا ہے-وزیراعلی مریم نواز شریف کے حکم پر پنجاب انفورسیمنٹ ریگولیٹری اتھارٹی (PERA) متحرک ہوگئی ہے-ناجائزمنافع خوری کے لیے مصنوعی قلت پیدا کرنے والے عناصر کے خلاف کریک ڈاؤن کا حکم دیا گیاہے،ملوث پمپس فوری سیل، لائسنس منسوخ ہوں گے- وزیراعلیٰ مریم نواز شریف نے پیرا کو ذخیرہ اندوزوں کے خلاف ‘زیرو ٹالرینس’ کی ہدایت کرتے ہوئے فیلڈ افسران کو پٹرول پمپس کی سخت مانیٹرنگ کا حکم دیاہے-کہا گیا کہ پٹرول مافیا کے گرد پنجاب حکومت نے فولادی شکنجہ تیارکرلیا ہے-پنجاب میں گلف ریجن کی جنگ کا بہانہ بنا کر عوام کی جیب پر ڈاکہ ڈالنے کی ہرگز اجازت نہیں دی جاے گی-پنجاب میں پٹرولیم مصنوعات کا وافر ذخیرہ موجود ہے، عوام افواہوں پر کان نہ دھریں -پٹرولیم مصنوعات سے متعلق قیاس آرائیوں پر حکومت پنجاب نے سخت انتباہ کیا کہ مصنوعی قلت کا شوشہ چھوڑنے والوں کا انجام عبرت ناک ہوگا-