ویمنز کرکٹ ٹیم کی کپتان فاطمہ ثنا کو ٹی20 سیریز اور آئی سی سی ورلڈ کپ کی قیادت سونپ دی گئی

لاہور۔(اسپورٹس رپورٹر):پاکستان ویمنز کرکٹ ٹیم کی کپتان فاطمہ ثنا کو آئرلینڈ میں ہونے والی تین ملکی ٹی20 سیریز اور آئی سی سی ویمنز ٹی ٹونٹی ورلڈ کپ2026 کے لئے قومی ٹیم کی قیادت سونپ دی گئی ہے۔پاکستان ویمنز ٹیم آئرلینڈ میں 28 مئی سے 4 جون تک کھیلی جانے والی سہ ملکی سیریز میں شرکت کرے گی،جس میں میزبان آئرلینڈ اور ویسٹ انڈیز کی ٹیمیں بھی شامل ہوں گی۔یہ سیریز قومی ٹیم کے لئے ورلڈ کپ سے قبل تیاری کا اہم موقع سمجھی جا رہی ہے۔قومی سکواڈ میں شامل نوجوان کھلاڑی ایمان فاطمہ، نتالیہ پرویز،رمین شمیم،سائرہ جبین اور تسمیہ رباب پہلی بار ویمنز ٹی 20 ورلڈ کپ کا حصہ بنیں گی۔پاکستان ویمنز ٹیم نے حال ہی میں کراچی میں زمبابوے کے خلاف ٹی20 سیریز میں شاندار کارکردگی دکھاتے ہوئے0-3 سے کلین سوئپ کیا تھا،جس سے کھلاڑیوں کے حوصلے بلند ہیں۔ورلڈ کپ سے قبل پاکستان ویمنز ٹیم6 جون کو سری لنکا جبکہ9 جون کو سکاٹ لینڈ کے خلاف وارم اپ میچز کھیلے گی۔قومی ٹیم اپنے ورلڈ کپ مہم کا آغاز 14 جون کو برمنگھم میں روایتی حریف بھارت کے خلاف میچ سے کرے گی۔اس کے بعد پاکستان کو17 جون کو جنوبی افریقہ،20 جون کو بنگلہ دیش اور23 جون کو آسٹریلیا کا سامنا ہوگا جبکہ گروپ مرحلے کے آخری میچ میں27 جون کو برسٹل میں نیدرلینڈز سے مقابلہ ہوگا۔پاکستان ویمنز سکواڈ میں فاطمہ ثنا،عالیہ ریاض،عائشہ ظفر،ڈیانا بیگ، ایمان فاطمہ،گل فیروزہ،ارم جاوید،منیبہ علی صدیقی،نشرہ سندھو،نتالیہ پرویز،رمین شمیم،سعدیہ اقبال،سائرہ جبین، تسمیہ رباب اور طوبی حسن شامل ہیں جبکہ ریزرو کھلاڑیوں میں امبر کائنات،مومنہ ریاست،صدف شمس، سدرہ امین،سیدہ عروب شاہ اور امِ ہانی کو رکھا گیا ہے۔