مکہ مکرمہ(نمائندہ خصوصی):وفاقی وزیر برائے مذہبی امور و بین المذاہب ہم آہنگی سردار محمد یوسف نے ارضِ مقدس پہنچ کر عمرہ کی سعادت حاصل کر لی ہے۔عمرہ کی ادائیگی کے بعد انہوں نے پاکستانی عازمین سے تفصیلی ملاقاتیں کیں۔ سردار محمد یوسف نے حجاج کرام سے مصافحہ کیا اور حج مشن کی جانب سے فراہم کردہ سفری، رہائشی اور طبی سہولیات کے معیار کے بارے میں براہِ راست فیڈ بیک لیا۔ عازمینِ حج نے وفاقی وزیر کو اپنے درمیان پا کر خوشی 
کا اظہار کیا اور حکومتِ پاکستان کے انتظامات پر بھرپور اطمینان کا اظہار کیا۔ وفاقی وزیر نے مسجد الحرام کے مختلف حصوں اور ملاحقہ راہداریوں میں تعینات حرم گائیڈز اور خدام الحجاج سے ملاقاتیں کیں۔سردار محمد یوسف نے موقع پر موجود عملے سے ان کے ڈیوٹی امور، شفٹوں کے اوقات اور ضعیف یا راستہ بھول جانے والے حجاج کی مدد کے لیے نافذ العمل طریقہ کار پر بات چیت کی۔ انہوں نے الرٹ اور متحرک انداز میں خدمات سرانجام دینے پر خدام کے جذبے کو سراہا۔اس موقع پر اپنے پختہ عزم کا اعادہ کرتے ہوئے وفاقی وزیر سردار محمد یوسف نے حج مشن کے حکام اور فیلڈ عملے کو سخت ہدایات جاری کیں کہ عازمینِ حج ہمارے معزز مہمان ہیں اور ان کی خدمت میں کوئی کسر اٹھا نہ رکھی جائے۔ انہوں نے تاکید کی کہ تمام حرم گائیڈز اور خدام 24 گھنٹے الرٹ رہیں تاکہ رواں سیزن کے دوران کسی بھی پاکستانی حاجی کو کسی پریشانی یا دشواری کا سامنا نہ کرنا پڑے۔
