چیئرمین پی سی بی محسن نقوی سے سرفراز احمدکی ملاقات ،سابق کپتان کی ملکی کرکٹ کیلئے گراں قدر خدمات کو سراہا

لاہور۔( نمائندہ خصوصی):پاکستان کرکٹ بورڈ (پی سی بی)کے چیئرمین محسن نقوی سے قومی کرکٹ ٹیم کے سابق کپتان سرفراز احمد نے لاہورمیں ملاقات کی،چیئرمین پی سی بی نے پاکستان کرکٹ کیلئے سرفراز احمد کی گراں قدر خدمات کو سراہا۔ملاقات کے دوران محسن نقوی نے سرفراز احمد کو انٹرنیشنل کرکٹ سے ریٹائرمنٹ پر اعزازی شیلڈ پیش کی اور ان کے مستقبل کے لیے نیک خواہشات کا اظہار کیا۔اس موقع پر محسن نقوی کا کہنا تھا کہ آپ نے کرکٹ میں پاکستان کی نمائندگی کا حق ادا کیا ہے اور اپنی شاندار کارکردگی سے پاکستان کرکٹ کو کئی کامیابیاں دلائیں۔ انہوں نے کہا کہ پاکستان کرکٹ ہمیشہ آپ کی خدمات کی مقروض رہے گی۔محسن نقوی نے مزید کہا کہ پاکستان کرکٹ بورڈ آئندہ بھی سرفراز احمد کے تجربے اور صلاحیتوں سے استفادہ کرتا رہے گا۔