ٹیم میں کوئی گروپنگ نہیں،تمام پلیئرز کا مورال بلند ہے،انگلینڈ کیخلاف ٹیسٹ سیریز میں اچھے نتائج دیں گے،نائب کپتان سعود شکیل

ملتان۔ (اسپورٹس رپورٹر )پاکستان ٹیسٹ کرکٹ ٹیم کے نائب کپتان و مڈل آرڈر بیٹسمین سعود شکیل نے کہا ہے کہ ٹیم میںکوئی گروپنگ نہیں، تمام پلیئرز کا مورال بلند ہے،انگلینڈ کے خلاف ٹیسٹ سیریز میں اچھے نتائج دیں گے۔ ان خیالات کا اظہار انہوں نے ہفتہ کو یہاں ملتان کرکٹ اسٹیڈیم میں میں پریس کانفرنس کرتے ہوئے کیا۔انہوں نے کہا کہ انگلینڈ ٹیم جارحانہ انداز میں کھیلتی ہے،اس میں غلطیاں بھی ہوتی ہی،ہماری کوشش ہو گی کہ انگلش پلیئرز سے زیادہ غلطیاں کروا کر سیریز جیتیں۔انہوں نے کہا کہ انگلینڈ کے حوالے زیادہ نہیں سوچتے، ہمیں اپنے پلان اور صورتحال کے مطابق کھیلنا ہے،تمام کھلاڑی بہت محنت کر رہے ہیں اور ہمیں سیریز جیتنی ہے،یہ ایک ایسا موقع ہے کہ ہمیں ہر شعبے میں پرفارم کرنا ہے،ٹیم کا مورال اچھا ہے،ٹیم میں کوئی گروپنگ نہیں ہے،سب کا فوکس اچھا کھیل پیش کرنے پر ہے، مجھے یقین ہے کہ ہم انگلینڈ کے خلاف اچھا کھیلیں گے،یہ ڈیلیور کرنے کا وقت ہے۔پچ سے متعلق پوچھے گئے سوال کے جواب میں انہوں نے کہا کہ ابھی ٹیسٹ میچ میں ایک دن باقی ہے،مجھے ابھی نہیں پتہ کہ پچ پر گرایس ہو گی یا نہیں،کنڈیشنز کے مطابق پلان کریں گے۔بابر اعظم کے کپتانی چھوڑنے کے حوالے سے پوچھے گئے سوال کے جواب میں سعود شکیل نے کہا کہ بابر اعظم کے کپتانی چھوڑنے کا تعلق وائٹ بال سے ہے اور ہم ریڈ بال کرکٹ کھیل رہے ہیں اس لیے کچھ نہیں کہہ سکتا،استعفیٰ دینا ہر کسی کا اپنا فیصلہ ہے۔انہوں نے کہا کہ بنگلادیش کے خلاف سیریز ماضی کا حصہ ہو چکی اب ہمارا فوکس آگے ہے۔ایک اور سوال کے جواب میں انہوں نے کہا کہ ہمیشہ ضرورت کے مطابق کھیلنے کی کوشش کرتا ہوں۔