جھوٹ ، منافقت عمران خان کی سیاست کا وطیرہ رہا ہے ۔ پاکستان کو جادوگروں اور جعلی عاملوں کے حوالے نہیں کیا جا سکتا ۔ شرجیل انعام میمن

کراچی (بیورورپورٹ ) صوبائی وزیر اطلاعات سندھ شرجیل انعام میمن نے عمران خان کے خطاب پر ردعمل دیتے ہوئے کہا ہے کہ ایمنسٹی انٹرنیشنل کی رپورٹ کے مطابق عمران خان کے دور اقتدار میں کرپشن میں پاکستان سب سے آگے رہا،عمران خان اس بات کا قوم کو جواب دیں ۔ اپنے جاری بیان میں انہوں نے کہا کہ افسوس کی بات ہے کہ عمران خان حج کے مقدس دن پر بھی جھوٹ اور الزامات لگاتے رہے ۔ عمران خان قوم سے مقدس دن پر ہی سچ بول لیتے۔ انہوں نے کہا کہ جھوٹ اور منافقت عمران خان کی سیاست کا وطیرہ رہا ہے ، عمران خان نے جھوٹ میں پی ایچ ڈی کی ہوئی ہے ۔شرجیل انعام میمن نے کہا کہ عمران خان نے اپنے دور میں مالم جبہ ، بلین ٹری سونامی ، پشاور بی آر ٹی سمیت نیب کے تمام میگا کرپشن اسکینڈلز بند کروائے ۔ عمران خان کے دور اقتدار میں بنی گالا کرپشن کا مرکز رہا ۔ شرجیل انعام میمن نے کہا کہ عمران خان نے اپنے دور اقتدار میں سیاسی مخالفین کے خلاف جعلی مقدمات بنائے ، جن کا اعتراف ان کے سابقہ وزراء کر رہے ہیں ۔ شرجیل انعام میمن نے کہا کہ عمران خان نے اپنی حکومت جادو ٹونے اور کالے علم کے ذریعے چلائی، جبکہ وہ ملک کے نااہل ترین وزیراعظم ثابت ہوئے ۔ صوبائی وزیر اطلاعات نے کہا کہ پاکستان کو جادوگروں اور جعلی عاملوں کے حوالے نہیں کیا جا سکتا ۔ عمران خان وہ شخص ہے جس نے اپنے محسنوں کے ساتھ بھی دغا بازی کی ۔ ان کی واویلا احتساب سے بچنے کی کوشش ہے ۔ عمران خان احتساب اور خود کو کرپشن اسکینڈلز سے بچانے کے لئے ماحول پیدا کر رہے ہیں ۔