لاہور ( نمائندہ خصوصی ) انسداد دہشت گردی ڈیپارٹمنٹ (سی ٹی ڈی) نے لاہور سمیت پنجاب کے مختلف اضلاع میں کارروائیاں کر کے 8دہشت گردوں کو گرفتار کرلیا۔سی ٹی ڈی ترجمان کے مطابق گرفتار دہشت گردوں سے دھماکہ خیز مواد ، ہینڈ گرینیڈ ، لٹریچر برآمد کیا گیا ۔ گرفتار دہشت گردوں میں فواد اللہ ، فقیر محمد ، آصف نواز ، ضیا الرحمان ، عتیق احمد اور بشیر شامل ہیںاور دہشت گردوں کا تعلق مختلف کالعدم تنظیموں سے ہے ۔ترجمان کا مزید کہنا تھا کہ لاہور سے کالعدم ٹی ٹی پی سے تعلق رکھنے والے اختر نواز اور داعش کے محمد عثمان کو گرفتار کیا گیا۔ گوجرانوالہ سے چار اور ڈی جی خان اور بہاولپور سے ایک ایک دہشت گرد کو گرفتار کیا گیا۔گرفتار دہشت گردوں کے خلاف چھ ایف آئی آر درج کر کے کاروائی کا آغاز کر دیا گیا۔ دہشت گردوں کو 21کومبنگ آپریشنز کے دوران مشتبہ افراد سے پوچھ گچھ کے دوران گرفتار کیا گیا۔سی ٹی ڈی نے پنجاب بھر میں رواں ہفتے 402 کومبنگ آپریشن کیے۔ کومبنگ آپریشن کے دوران 22921مشتبہ افراد کو چیک کر کے 118مشتبہ افراد گرفتار کیا گیا جبکہ ان دہشت گردوں کے خلاف 89مقدمات کا اندراج کیا گیا۔
