لاہور (نمائندہ خصوصی) پنجاب میں کاﺅنٹر ٹیرر ازم ڈیپارٹمنٹ (سی ٹی ڈی)نے مختلف اضلاع میں انٹیلی جنس بنیاد پر آپریشن کرتے ہوئے کالعدم تنظیموں سے تعلق رکھنے والے 9 دہشت گرد گرفتار کرلئے۔ترجمان سی ٹی ڈی پنجاب کے مطابق گرفتار دہشت گردوں میں عفان، کاشف ، جواد سعید، ثاقب الیاس، سبز علی، داد شاہ اور احمد جان شامل ہیں، دہشت گردوں کے خلاف 10مقدمات درج ہیں جن کی تفتیش جاری ہے۔ترجمان سی ٹی ڈی کا کہنا ہے کہ کارروائی کے دوران خودکش جیکٹ، دھماکا خیز مواد، دستی بم، ڈیٹونیٹر ، اسلحہ، ریموٹ کنٹرول ڈیوائس اور حساس مواد پر مشتمل کتابیں برآمد کرلی گئیں۔ترجمان کے مطابق دہشت گردوں کا تعلق کالعدم ٹی ٹی پی اور داعش کے مختلف گروپوں سے ہے، دہشت گردوں کی شناخت 26مشتبہ افراد سے تفتیش کے دوران ہوئی۔ترجمان سی ٹی ڈی نے کہا ہے کہ رواں ہفتے 564 کومبنگ آپریشنز میں 93مشتبہ افراد گرفتار کئے گئے۔
