عمران خان ملک کے اداروں کی شرافت کا ناجائزفائدہ اٹھا رہے ہیں، غلیظ زبان استعمال کر کے اداروں اور پورے ملک کےخلاف گھناﺅنی سازش کر رہے ہیں، وزیراطلاعات سندھ شرجیل میمن

کراچی

سندھ کے وزیراطلاعات شرجیل انعام میمن نے کہاہے کہ عمران خان اور دیگر پی ٹی آئی رہنما ملک کے اداروں کی شرافت کا ناجائز فائدہ اٹھا رہے ہیں ۔شرجیل انعام میمن نے بیان میں کہا کہ عمران خان جو غیر اخلاقی زبان اور جھوٹے بہتان مخالفین، معزز جج صاحبان اور الیکشن کمشنر کے خلاف استعمال کرتے تھے ،اب وہی غیر اخلاقی زبان اور جھوٹی بہتان بازی افواج پاکستان کے سینئر افسران کے خلاف کر رہے ہیں ۔انہوں نے کہا کہ عمران خان کیئریر افسران اور اعلی فوجی عہدیداروں کے خلاف غلیظ زبان استعمال کر کے اداروں اور پورے ملک کے خلاف گھناﺅنی سازش کر رہے ہیں،اس گھناﺅنی مہم کا مقصد اسرائیلی اور بھارتی آقاﺅں کو خوش کرنا ہے۔شرجیل میمن نے کہاکہ عمران خان افواج پاکستان کے جن اعلیٰ افسران کے نام لے رہے ہیں ان کا شاندار پروفیشنل کریئر رہا ہے اور عمدہ شہرت کے حامل افسران ہیں ، جس طرح عمران خان نے معزز عدالتوں اور الیکشن کمیشن پر دباﺅ ڈالا ان افسران پر بھی تنقید کر کے دباﺅ ڈالنا چاہتے ہیں، عمران خان چاہتے ہیں کہ ہر ادارہ ان کی ٹائیگر فورس کی طرح کام کرے اور عمران خان کی غلامی کرے، اگر عمران خان نے اپنے ناپاک عزائم کو ختم نہ کیا اور اپنی زبان کو قابو میں نہ لائے تو 22 کروڑ عوام انہیں کبھی معاف نہیں کریں گے ۔