وفاقی وزیر و سینیٹر طلحہ محمود کی ڈاکٹر فوزیہ و عافیہ صدیقی کی والدہ کی وفات پر اظہار تعزیت ہمارے حکام کو اللہ تعالیٰ حوصلہ دے کہ وہ اپنے لوگوں کی حفاظت کر سکیں: سینیٹر طلحہ محمود

کراچی (نمائندہ خصوصی ) وفاقی وزیر برائے ریاست و سرحدی امور سینیٹر طلحہ محمود ڈاکٹر فوزیہ و عافیہ صدیقی کی والدہ عصمت صدیقی کی وفات پر اظہار تعزیت کیلئے ان کی رہائش گاہ پرتشریف لائے، انہوں نے مرحومہ کو شاندار الفاظ میں خراج تحسین پیش کیا اور ان کے ایصال ثواب کیلئے دعائے مغفرت کی۔ اس موقع پر ڈاکٹر فوزیہ صدیقی سے گفتگو کرتے ہوئے سینیٹر طلحہ محمود نے بتایا کہ وہ گزشتہ ڈیڑھ ماہ سے ملک سے باہر تھے جس کی وجہ سے تعزیت کیلئے آنے میں تاخیر ہوئی۔ انہوں نے ڈاکٹر عافیہ صدیقی کی امریکی جیل میں قید کو غیرقانونی قرار دیتے ہوئے کہا کہ والدہ عصمت صدیقی نے 20 سال تک جس طرح اس عظیم صدمہ پر صبر و استقامت کا مظاہرہ کیا اس کی بہت کم مثالیں ملتی ہیں۔ انہوں نے کہا والدہ نے ہمیشہ ملک کے عزت و وقار کی بات کی۔وہ بہت بہادر، دلیر اور صبر والی خاتون تھیں۔ میری جب بھی ان سے ملاقات ہوئی تو میں نے کبھی یہ محسوس نہیں کیا کہ وہ مایوس ہوئی ہوں۔ انہوں نے ہمیشہ تکالیف کا سامنا بلند حوصلے کے ساتھ کیا اور ایسا بہت کم دیکھنے میں آتا ہے۔ان کی خواہش ہوتی تھی کہ ملک کے مسائل حل ہوں۔ وہ آج دنیا میں نہیںہیں مگر میں ان کی ہمت و حوصلے کے باعث انہیں یاد کرتا ہوں۔ وہ بہت مہمان نواز خاتون تھیں۔اپنے ہاتھوں سے کھانابنا کر کھلانا مہمان نوازی کی بڑی مثال ہے۔ انہوں نے بڑی عزت اور احترام والی زندگی گزاری ، اللہ ان کی مغرت فرمائے، جنت الفردوس میں اعلیٰ مقام عطا فرمائے اور اس گھرانے پر طویل عرصہ سے جو آزمائش ہے اللہ تعالیٰ اسے بھی ختم فرمائے۔ سینیٹر طلحہ محمود نے کہا کہ ڈاکٹر عافیہ کے حوالے سے کہا کہ ہمارے حکام کو اللہ تعالیٰ حوصلہ دے کہ وہ اپنے لوگوں کی حفاظت کر سکیں۔