اسلام آباد۔ (اسٹاف رپورٹر) پریس انفارمیشن ڈیپارٹمنٹ ( پی آئی ڈی ) کے پراجیکٹ پاکستان انفارمیشن سینٹر اور ورچوئل یونیورسٹی کے تعاون سے دو روزہ “موبائل جرنلزم” کے عنوان سےاسلام آباد میں ایک ورکشاپ کا انعقاد کیا گیا ۔جس میں ملک بھر سے صحافیوں نے شرکت کی۔ ورکشاپ میں صحافت کے حوالے سےماہر اور تجربہ کار ٹرینرز نے صحافت میں استعمال ہونے والے جدید آلات اور ان کے لئے ضروری تکنیکی صلاحیتوں کو بروئے کار لانے کے حوالے سے مفید اور سود مند لیکچرز دئیے۔
اس ورکشاپ کی مہمان خصوصی وفاقی وزیر اطلاعات و نشریات مریم اورنگزیب نے پرنسپل انفارمیشن آفیسر مبشر حسن ،ڈائریکٹر جنرل انفارمیشن سروسز اکیڈمی سعید جاوید ، پریس کلب کے عہدیداران صدر انور رضا ،جنرل سیکرٹری خلیل راجہ فنانس سیکرٹری نئیر علی ،کوآرڈینیٹر مدثر چوہدری ، ورچوئل یونیورسٹی کے ٹرینرز کو شیلڈز دیں جبکہ ورکشاپ میں حصہ لینے والے صحافی خواتین وحضرات میں سرٹیفکیٹ تقسیم کئے۔
مریم اورنگزیب نے اس موقع پر خطاب کرتے ہوئے کہا کہ مستقبل ڈیجیٹل میڈیا کا ہے اور وزارت اطلاعات ونشریات صحافیوں کی استعداد کار بڑھانے کے لیے اس طرح کی مزید ورکشاپ منعقدکرواتی رہے گی،سابقہ دور میں میڈیا کو بری طرح سے دبایا گیا اورمیڈیا ورکرز کو بیروزگار کیا گیا لیکن ہم اس طرح کی ٹریننگ کی ورکشاپس کے ذریعہ سے صحافیوں کے روزگار کا بندوست کریں گے۔
