مظفر آباد(اسپورٹس رپورٹر )کشمیر پریمیئر لیگ (کے پی ایل) میں آج (جمعرات کو ) مزید دو میچ کھیلے جائیں گے۔ پہلا میچ میرپور رائلز اور اوورسیز واریئرز کی ٹیموں کے درمیان کھیلا جائے گا جبکہ دوسرا میچ جموں جانباز اور کوٹلی لائنز کی ٹیموں کے درمیان کھیلا جائے گا ۔
دوسری کشمیر پریمیئر لیگ کے دلچسپ مقابلے مظفر آباد سٹیڈیم میں جاری ہیں، جمعرات کو لیگ کے گیارہویں میچ میں میرپور رائلز اور اوورسیز واریئرز کی ٹیمیں نبرد آزما ہوں گی ۔ میرپور رائلز کی ٹیم ٹیبل پر دو پوائنٹس کے ساتھ تیسرے نمبر پر ہے جبکہ اوورسیز واریئرز کی ٹیم دو میچ کھیل چکی ہے اور کوئی میچ جیت نہیں سکی ہے۔
لیگ کے بارہویں میچ جو نائٹ ہوگا میں جموں جانباز اور کوٹلی لائنز کی ٹیمیں پنجہ آزما ہوں گی۔ کشمیر پریمیئر لیگ کا فائنل میچ 26 اگست کو کھیلا جائے گا۔
