پاکستان میں بسنے والی تمام اقلیتی برادریاں ملک کی تعمیر و ترقی میں برابر کی شریک ہیں۔ محترمہ فرح عظیم شاہ

کوئٹہ(نمائندہ خصوصی): بلوچستان عوامی پارٹی کے صوبائی خواتین ونگ کی صدر اور رکن صوبائی اسمبلی اور چیئرپرسن ایمان پاکستان ٹرسٹ محترمہ فرح عظیم شاہ نے 11 اگست اقلیتی قومی دن کے موقع پر اپنے جاری کردہ بیان میں کہا ہے کہ پاکستان میں بسنے والی تمام اقلیتی برادریاں ملک کی تعمیر و ترقی میں برابر کی شریک ہیں۔ اقلیتیوں کا قومی دن ہمیں یہ یاد دلاتا ہے کہ پاکستان کی بنیاد ہی مساوات، مذہبی آزادی، رواداری اور باہمی احترام کے اصولوں پر رکھی گئی ہے۔انہوں نے کہا کہ 11 اگست 1947 کو قائداعظم محمد علی جناحؒ نے اپنی تاریخی تقریر میں واضح پیغام دیا تھا کہ ریاست پاکستان میں ہر شہری کو اپنے مذہب، عقیدے اور عبادات کی مکمل آزادی حاصل ہوگی۔قائداعظم کے اس وژن کی روشنی میں ہمیں ایک ایسا معاشرہ تشکیل دینا ہے جہاں کسی بھی شہری کے ساتھ مذہب، رنگ، نسل یا عقیدے کی بنیاد پر امتیازی سلوک نہ ہو۔میڈم فرح عظیم شاہ نے کہا کہ بلوچستان ہمیشہ سے مذہبی ہم آہنگی، رواداری اور بھائی چارے کی خوبصورت مثال رہا ہے۔ صوبے میں ہندو، مسیحی، سکھ، زرتشتی اور دیگر اقلیتی برادریوں نے بلوچستان کی سماجی، معاشی، تعلیمی اور ثقافتی ترقی میں نمایاں کردار ادا کیا ہے۔ ان کی خدمات کو قدر کی نگاہ سے دیکھتے ہیں اور صوبائی حکومت اقلیتی برادریوں کے حقوق، جان و مال کے تحفظ اور فلاح و بہبود کے لیے ہر ممکن اقدامات جاری رکھے گی انہوں نے کہا کہ اقلیتی برادریوں کے نوجوان پاکستان کا قیمتی سرمایہ ہیں، انہیں تعلیم، روزگار اور ترقی کے یکساں مواقع فراہم کرنا ہماری مشترکہ ذمہ داری ہے۔ خواتین اور نوجوانوں کی طرح اقلیتی برادریوں کو بھی قومی اور صوبائی سطح پر فیصلہ سازی کے عمل میں مؤثر نمائندگی ملنی چاہیے۔رکن صوبائی اسمبلی نے کہا کہ بلوچستان عوامی پارٹی قائداعظم کے نظریات اور آئین پاکستان میں دیے گئے بنیادی حقوق پر یقین رکھتی ہے۔ ہماری کوشش ہے کہ صوبے میں تمام شہریوں کو مساوی حقوق، تحفظ اور ترقی کے مواقع میسر ہوں۔ مذہبی ہم آہنگی اور بین المذاہب احترام کو فروغ دے کر ہی ایک مضبوط، پرامن اور خوشحال بلوچستان کی بنیاد رکھی جا سکتی ہے۔۔۔میڈم فرح عظیم شاہ نے اقلیتی برادریوں کو 11 اگست کے موقع پر مبارکباد پیش کرتے ہوئے کہا کہ پاکستان ہم سب کا مشترکہ وطن ہے اور اس کی ترقی، خوشحالی اور استحکام میں ہر شہری کا برابر کا کردار ہے۔ انہوں نے اس عزم کا اظہار کیا کہ اقلیتی برادریوں کے جائز حقوق کے تحفظ اور انہیں معاشرے میں باعزت اور مساوی مقام دلانے کے لیے ہر ممکن کوشش جاری رکھی جائے گی۔انہوں نے کہا کہ ہمیں نفرت، تعصب اور تفریق کے بجائے محبت، برداشت، اتحاد اور بھائی چارے کو فروغ دینا ہوگا۔ یہی قائداعظم کا پاکستان ہے اور یہی ایک مضبوط و متحد پاکستان کی ضمانت ہے۔