وفاقی وزیر مواصلات عبدالعلیم خان کا ڈائریکٹوریٹ جنرل آف پاکستان پوسٹ کا دورہ، مالی نقصانات کو ختم کرنے کیلئے تین ماہ کے اندر تنظیم نو کا حقیقت پسندانہ پلان پیش کرنے کی ہدایت

اسلام آباد(نمائندہ خصوصی)وفاقی وزیر مواصلات عبدالعلیم خان نے ڈائریکٹوریٹ جنرل پاکستان پوسٹ کا دورہ کیا اور ادارے کی کارکردگی، مالی صورتحال اور مستقبل کی حکمت عملی کے حوالے سے اعلیٰ سطح کے اجلاس کی صدارت کی۔ وفاقی وزیر عبدالعلیم خان نے پاکستان پوسٹ میں جامع اصلاحات لانے ، تنظیم نو کرنے اور ادارے کے جدید تقاضوں سے ہم آہنگ ہونے کی ضرورت پر زور دیتے ہوئے کہا کہ پاکستان پوسٹ آئندہ تین برسوں کے لئے قابلِ عمل اور حقیقت پسندانہ بزنس پلان مرتب کرے تاکہ اسے مالی خود مختاری حاصل ہوسکے اور قومی خزانے پر بوجھ کم ہو۔وفاقی وزیر مواصلات عبدالعلیم خان نے کہا کہ پاکستان پوسٹ کو مارکیٹ کے بدلتے ہوئے تقاضوں اور مسابقتی ماحول کے مطابق ڈھالنا ناگزیر ہے۔ انہوں نے واضح کیا کہ ادارے میں پرانی روش کو ترک کرکے جدید اور مؤثر ورکنگ ماڈل اپنانا ہوگا تاکہ پاکستان پوسٹ جیسے تاریخی ادارے کو منافع بخش اور عوامی ضروریات سے ہم آہنگ بنایا جا سکے۔وفاقی وزیر مواصلات نے کہا کہ پاکستان پوسٹ کے مستقبل کا دارومدار اس کی کارکردگی میں حقیقی بہتری پر ہے اور ادارے کے 20 ہزار ملازمین کو اپنے تحفظ اور ترقی کے لئے بھرپور کردار ادا کرنا ہوگا۔ انہوں نے اس امر پر زور دیا کہ تمام متعلقہ شعبے مل بیٹھ کر ادارہ جاتی اصلاحات کو یقینی بنائیں اور ٹھوس بنیادوں پر بہتری کے اقدامات تجویز کریں۔وفاقی وزیر مواصلات عبدالعلیم خان نے نئے ڈائریکٹر جنرل کو ہدایت کی کہ وہ ادارے کی قیادت کرتے ہوئے گزشتہ برسوں کی کمزوریوں کا ازالہ کریں اور تین ماہ کے اندر واضح اور قابلِ عمل اصلاحاتی منصوبہ پیش کریں۔ انہوں نے نجی شعبے کی شمولیت، مختلف شعبوں کی آؤٹ سورسنگ اور دن رات کام کرکے ادارے کی استعداد بڑھانے کی بھی ہدایت دی۔وفاقی وزیرعبدالعلیم خان نے پاکستان پوسٹ کے سالانہ خسارے میں کمی کے لئے دیرپا پالیسی اختیار کرنے کی ضرورت پر زور دیتے ہوئے کہا کہ اگر ادارہ مالی خود مختاری حاصل نہ کر سکا تو اسے مستقبل میں برقرار رکھنا مشکل ہو جائے گا۔ انہوں نے خبردار کیا کہ پاکستان پوسٹ میں بہتری نہ آنے کی صورت میں حکومت نجکاری سمیت دیگر آپشنز پر غور کرنے پر مجبور ہو سکتی ہے۔عبدالعلیم خان نے کہا کہ یہ ادارے کے لئے ایک فائنل وارننگ ہے اور اب مزید تاخیر یا کوتاہی کی کوئی گنجائش نہیں۔ انہوں نے پاکستان پوسٹ کی کارکردگی کا جائزہ لینے کے لئے ایک ہفتے بعد دوبارہ اجلاس طلب کرتے ہوئے متعلقہ حکام کو اصلاحاتی اقدامات پر پیشرفت رپورٹ پیش کرنے کی ہدایت کی۔اجلاس میں وفاقی سیکرٹری مواصلات سمیت پاکستان پوسٹ کے اعلیٰ حکام نے شرکت کی جبکہ ڈائریکٹر جنرل پاکستان پوسٹ سکوارڈن لیڈر (ر) مقصود احمد نے ادارے کی موجودہ صورتحال پر تفصیلی بریفنگ دی۔