وزیراعظم محمد شہباز شریف کی چین کی اکیڈمی آف ایگریکلچرل سائنسز اور پاکستان ایگریکلچرل ریسرچ کونسل کے درمیان تعاون کو عملی جامہ پہنانے کی ہدایت

اسلام آباد۔(نمائندہ خصوصی):وزیراعظم محمد شہباز شریف نے چین کی اکیڈمی آف ایگریکلچرل سائنسز اور پاکستان ایگریکلچرل ریسرچ کونسل (پی اے آر سی ) کے درمیان تعاون کو عملی جامہ پہنانے کی ہدایت کرتے ہوئے کہا ہے کہ زرعی تحقیق، جدید ٹیکنالوجی اور پاک-چین مشترکہ منصوبوں کے ذریعے پاکستان کے زرعی شعبے میں انقلابی تبدیلی لائی جا سکے گی۔ وزیراعظم محمد شہباز شریف کی زیر صدارت ان کے حالیہ دورہ چین کے دوران منعقدہ پاکستان-چین بزنس ٹو بزنس کانفرنس کے دوران کیے گئے فیصلوں کی پیشرفت کا جائزہ لینے کیلئے منعقدہ اجلاس سے خطاب کرتے ہوئے وزیراعظم نے کہا کہ پاکستان اور چین کے نجی شعبے کے درمیان کاروباری روابط میں غیرمعمولی اضافہ دونوں ممالک کی اقتصادی شراکت داری کے نئے دور کا آغاز ہے۔وزیراعظم آفس کے میڈیا ونگ کی طرف سے پیر کو جاری بیان کے مطابق وزیراعظم نے کہا کہ چین کے ساتھ صنعتی، زرعی اور تکنیکی تعاون کے فروغ سے پاکستان کی برآمدات میں اضافہ اور روزگار کے نئے مواقع پیدا ہوں گے۔ انہوں نے ہدایت کی کہ ہانگژو بی ٹو بی کانفرنس میں طے پانے والی مفاہمتی یادداشتوں کو جلد باقاعدہ معاہدوں اور مشترکہ منصوبوں میں تبدیل کیا جائے۔ وزیراعظم نے کہا کہ بی ٹو بی کانفرنس سے متعلق پیش رفت کا جائزہ لینے کیلئے ماہانہ بنیادوں پر اجلاس کی وہ خود صدارت کریں گے۔ انہوں نے ہدایت کی کہ چین کی اکیڈمی آف ایگریکلچرل سائنسز اور پاکستان ایگریکلچرل ریسرچ کونسل (پی اے آر سی) کے درمیان تعاون کو عملی جامہ پہنایا جائے۔انہوں نے کہا کہ زرعی تحقیق، جدید ٹیکنالوجی اور پاک-چین مشترکہ منصوبوں کے ذریعے پاکستان کے زرعی شعبے میں انقلابی تبدیلی لائی جا سکے گی۔ وزیراعظم کو بریفنگ میں بتایا گیا کہ ہانگژو میں 24 مئی کو منعقدہ پاکستان-چین بی ٹو بی کانفرنس میں 123 پاکستانی اور 436 چینی کمپنیوں نے شرکت کی۔ کانفرنس کے دوران تقریباً 7.54 ارب ڈالر مالیت کی 207 مفاہمتی یادداشتوں پر دستخط کیے گئے۔بریفنگ کے مطابق بیٹری انرجی سٹوریج سسٹمز، مصنوعی ذہانت ، موبائل فونز اور ہینڈ ہیلڈ ڈیوائسز کے شعبوں میں مفاہمتی یادداشتوں پر دستخط ہوئے۔ اس کے علاوہ کھاد، بیج، آبپاشی کے جدید آلات، فشریز اور فوڈ پروسیسنگ کے شعبوں میں وسیع تعاون کے لیے بھی مفاہمتی یادداشتوں پر دستخط ہوئے۔ بائیو ٹیکنالوجی اور ویکسین سازی سمیت جدید صنعتی شعبوں میں مشترکہ سرمایہ کاری کے لئے ایم او یوز پر دستخط ہوئے۔ اجلاس میں وفاقی وزراء رانا تنویر حسین، احد خان چیمہ، احسن اقبال ، شزا فاطمہ خواجہ اور متعلقہ اعلیٰ سرکاری افسران نے شرکت کی ۔