فہد ہارون نے مکہ مکرمہ سے منیٰ روانگی کے موقع پر ایک جذباتی پیغام میں حج کو ’’زندگی بھر کی دعا کی قبولیت‘‘ قرار دیدیا

اسلام آباد۔(نمائندہ خصوصی):وزیر مملکت اور وزیرِ اعظم کے معاونِ خصوصی برائے ڈیجیٹل میڈیا فہد ہارون نے مکہ مکرمہ سے منیٰ روانگی کے موقع پر ایک جذباتی پیغام میں حج کو "زندگی بھر کی دعا کی قبولیت” قرار دیاہے۔سوشل میڈیا پلیٹ فارم ایکس پراپنی پوسٹ میں فہد ہارون نے اس مقدس سفر کے لیے منتخب ہونے پر عاجزی اور شکرگزاری کا اظہار کیا اور کہا کہ یہ ان کے لیے ایک عظیم اعزاز ہے کہ وہ فریضۂ حج ادا کرنے والے لاکھوں خوش نصیب عازمین میں شامل ہیں۔انہوں نے کہا کہ وہ پاکستان کے لیے خصوصی دعائیں ساتھ لے کر جا رہے ہیں، جن میں ملک کے امن، اتحاد، طاقت اور خوشحالی کے ساتھ ساتھ پورے خطے اور امتِ مسلمہ کے لیے امن و استحکام کی دعائیں شامل ہیں۔فہد ہارون نے اپنی مرحومہ والدہ، اہلِ خانہ اور دوستوں کے لیے بھی مغفرت اور رحمت کی دعا کی اور اللہ تعالیٰ سے دعا کی کہ یہ روحانی سفر سب کے لیے تجدید، رحم دلی اور بخشش کا ذریعہ بنے۔ایکس پر شیئر کی گئی تصویر میں ان کے ہمراہ وفاقی وزیر برائے دفاعی پیداوار رضا حیات ہراج، گورنر سندھ نہال ہاشمی اوروفاقی وزیر تعلیم وپشہ وارانہ تربیت خالد مقبول صدیقی سمیت دیگر شخصیات بھی موجود تھیں۔فہد ہارون کی اس پوسٹ کو سوشل میڈیا صارفین کی جانب سے خوب سراہا گیا، جبکہ لوگوں نے ان کے حج کی قبولیت اور بخیر و عافیت تکمیل کے لیے نیک تمناؤں اور دعاؤں کا اظہار بھی کیا۔