مکہ مکرمہ(نمائندہ خصوصی):وفاقی وزیر برائے مذہبی امور سردار محمد یوسف نے طوافہ صرف کمپنی "رواف منی” کے مرکزی دفتر اور منٰی مکاتب کا تفصیلی دورہ کیا، جہاں انہوں نے حج 2026ء کے دوران پاکستانی حجاج کرام کے لیے منٰی کے خیموں میں فراہم کردہ رہائشی و دیگر سفری سہولیات کا موقع پر جائزہ لیا۔ اس موقع پر گفتگو کرتے ہوئے وزیر مذہبی امور نے کہا کہ اللہ کے مہمانوں کی خدمت کرنا ایک عظیم سعادت ہے اور امسال 23 ہزار پاکستانی حجاج کرام رواف منی کے زیر انتظام مناسکِ حج ادا کر رہے ہیں، لہٰذا ہم امید کرتے ہیں کہ کمپنی پاکستانی ضیوف الرحمن کا 
بھرپور اور مثالی خیال رکھے گی۔کے دوران ڈائریکٹر حج مکہ عارف اسلم راؤ نے وفاقی وزیر کو بریفنگ دیتے ہوئے بتایا کہ پاکستان حج مشن کی پوری ٹیم حجاج کرام کو ہر ممکن آرام و آسائش فراہم کرنے کے لیے تمام سٹیک ہولڈرز کے ساتھ مسلسل اور قریبی رابطے میں ہے۔ انہوں نے عزم ظاہر کیا کہ حج آپریشن کو مروجہ پلان کے مطابق کامیابی سے ہمکنار کیا جائے گا۔دوسری جانب طوافہ کمپنی رواف منی کے چیف ایگزیکٹو آفیسر زہیر سدایو نے وزیر مذہبی امور کو خوش آمدید کہتے ہوئے کہا کہ ان کی کمپنی امسال اتنی بڑی تعداد میں پاکستانی حجاج کی خدمت کرنے پر فخر اور دلی خوشی محسوس کرتی ہے۔انہوں نے یقین دہانی کرائی کہ حجاج کرام کی آسانی، سلامتی اور مناسک کی بروقت ادائیگی کے لیے رواف منی سعودی وزارتِ حج و عمرہ کے ساتھ مسلسل رابطے میں ہے۔ سی ای او زہیر سدایو نے ایک اہم پیشرفت کا ذکر کرتے ہوئے یہ بھی کہا کہ انتظامی امور کو مزید آسان بنانے کے لیے رواف منی یہ کوشش کرے گی کہ اگلے سال "نیسک کارڈز” کی تقسیم پاکستان کے اندر ہی مکمل کر دی جائے تاکہ حجاج کو ارضِ مقدسہ پہنچ کر کسی قسم کے انتظار کی زحمت نہ اٹھانی پڑے۔
