کشمیریوں کی جائیدادوں کی ضبطگی اور مسماری کا سلسلہ جاری

سری نگر۔(نمائندہ خصوصی)بھارت کے غیر قانونی زیر قبضہ جموں وکشمیر میں نئی دلی کے مسلط کردہ لیفٹیننٹ گورنر کی سربراہی میں قائم انتظامیہ کیطرف سے کشمیریوں کی جائیدادوں کی ضبطگی اور مسماری کا سلسلہ بدستور جاری ہے۔ہفتہ کو کشمیر میڈیاسروس کے مطابق بھارتی پولیس نے لیفٹیننٹ گورنر کے حکم پر ضلع کولگام کے علاقے یاری پورہ میں عمر یوسف راتھر کا گھر ضبط کر لیا جس کی مالیت 51لاکھ روپے بتائی جا رہی ہے ۔پولیس نے ضلع کولگام ہی کے علاقے منزگام میں ایک اور کارروائی کے دوران بشیر احمد گنائی نامی شہری کی ایک دکان اور سٹور مسمار کردیا۔پولیس نے ضلع بارہ مولہ کے علاقے ٹنگمرگ میں زاہد احمد میر کا رہائشی مکان ضبط کر لیا ۔ بھارتی پولیس نے ضلع بارہمولہ کے علاقے پٹن سے مصدق رشید یتو اور عرفان یوسف جبکہ ضلع اسلام آباد کے علاقے ککر ناگ سے اعجاز احمد وانی اور رﺅف احمد بٹ کو گرفتار کر لیا۔ بھارتی فورسز نے ضلع راجوری کے علاقوں پاری نالہ گمبھیر مغلاں اور ڈوریمل میں محاصرے اور تلاشی کی کارروائیاں شروع کردی ہیں۔فورسز اہلکاروں نے دونوں علاقوں کے تمام داخلی اور خارجی راستے سیل کر کے گھرگھر تلاشی کا عمل شروع کر دیا جس سے مقامی لوگوں کی مشکلات میں ضافہ ہو گیا ہے